Eritsuka omwa bulere bwiwe, Samweli abya ikere n’erikolera eyiri ehema, eya bandu babya bakayaramirya Yehova. Wunasi Samweli ng’ahikayo athi? Thuthatsuka erigha oku mama wa Samweli, ya Hana.

Ahabw’emyaka minene, Hana mwathabutha mwana, nomwanabya anzire eributha. Neryo mwasaba Yehova n’erimulemba-lemba athi amuwathikaye. Mwayilhagha athi amabutha ow’obulhume, iniakendi syamuthwalha eriyikalha n’erikolera eyiri ehema. Yehova mwowa emisabe yiwe, neryo amabutha omwana w’obulhume. Mwamwahulha mwa Samweli. Neryo Samweli abere abirihikya myaka isathu kutse ini, Hana mwakolha ngoku ayilhagha, amamuthwalha eyiri ehema eriyakolera Nyamuhanga.

Eli yuwabyayo ng’omuhereri mukulhu. N’abaghalha biwe babiri nabu ibakakolerayo ng’abahereri. Wibuke ngoku eyiri ehema, eyo ya bandu babya bakayaramirya Nyamuhanga, kandi abandu ibatholere ibakolerayo ebyuwene. Aliriryo baghalha ba Eli ibakakolha ebibi bisa-bisa. Samweli mwalhangira ebya babya bakakolha. Samweli mwanakolha ebindu bibi nga baghalha ba Eli?— Eyihi, iyo mwabya akakolha ebyuwene, ngoku ababuthi biwe babya ibabirimukangirirya.

Wukalengekanaya Eli aby’atholere iniakolha baghalha biwe bathi?— Aby’atholere iniabasuyira kutse eribaha ekifubiro. Syabya atholere erithasyabalighira erikolera eyiri ehema ya Nyamuhanga. Aliriryo Eli mwathakolha ekyo, neryo Yehova mwamuhithanako n’abaghalha biwe babiri. Yehova mwathwamu eribasuyira.

Omwa kiro, Samweli inianaghotsere, mwowa omundu akamubirikira athi: ‘Samweli!’ Neryo mwanguha eyiri Eli, aliriryo Eli mwabugha athi: ‘Singathakubirikira.’ Mwathasyabirikirwa eyindi mirundi  ibiri. Okwa murundi wakasathu, Eli mwabwira Samweli athi amathasyowa bakamubirikira, abughe athi: ‘Yehova, bugha, nganakuhulikirire.’ Neryo ekyo kya Samweli aby’akolire. Neryo Yehova mwabwira Samweli athi: ‘Wubwire Eli wuthi ngend’itha ab’eka yiwe busana n’ebindu bibi ebya babirikolha.’ Wukalengekanaya kyanabya kyolho Samweli eribwira Eli y’omwatsi oyu?— Eyihi, sikyabya kyolho. Aliriryo nomwakine indi Samweli mwasagha, mwakolha ekya Yehova amubwira athi akole. Ekya Yehova abugha mukyabererera. Baghalha ba Eli babiri mubithibwa, na Eli nayu mwaholha.

Samweli ni ky’erileberyako ekyuwene okw’ithwe. Mwakolha ebyuwene nomwanabya alhangire abandi bakakolha ebindu bibi. Kandi ibbwa iwe? Wunemwendibya nga Samweli iwabya wukakolha ebyuwene? Wamakolha ekyo, iwukendi tsemesya Yehova n’ababuthi bawu.