Timoteo abya mwojo oyuwabya anzire eriwathikya abandu. Mwahika omwa bihugho binene busana n’eriwathikya abandi. Busana n’eki, mwabana etseme nene. Wunanzire eriminya ng’abanayo athi?—

Timoteo mwakulira omwa tawuni eyabya yikahulhwa mwa Listra. Omughulhu abya mwana, mukaka wiwe ya Loisi na mama wiwe, ya Euniki, mubatsuka erimukangirirya oku Yehova. Timoteo abere anemukulha, mwanza eriwathikya abandi erigha oku Yehova.

Timoteo iniakine mwojo mulere, Paulo mwamubwira athi baghende haghuma omwa bindi bihugho eriyathulira. Timoteo mwikirirya! Mwaligha eriyawathikya abandi.

 Timoteo mwaghenda na Paulo omwa tawuni eyikahulhawa mwa Tesalonika eyiri e Makedonia. Erithoka erihikayo, mubatsuka erilyatha lhughendo lhuuli n’enyuma waho bamaghenda n’omwa bwathu. Babere bahika, mubawathikya abandu banene erigha oku Yehova. Aliriryo abandi bandu mubahithana kandi bamanza eribakolha nabi. Eki mukyaleka Paulo na Timoteo ibalhuayo neryo bamayathulira ehandi.

Habere hahwa myezi mirebe, Paulo mwabwira Timoteo athi asube e Tesalonika eriyalebya abandi Bakristayo. Mukyayithaghisya obuthubaha erisuba omwa tawuni nyibi eyo! Aliriryo Timoteo mwaghendayo kundi abya anzire eriminya balikyabo nga bali bathi. Mwasuba eyiri Paulo iniane n’omwatsi mubuya. Balikyabo abe Tesalonika babya ibanemukolha ndeke!

Timoteo mwakolha na Paulo ahabw’emyaka minene. Kiro kighuma Paulo mwanahandika athi sihali owundi nga Timoteo oyo angathuma eriyawathikya ebithunga. Timoteo aby’anzire Yehova n’abandu.

Wunanzire abandu n’erianza eribawathikya erigha oku Yehova?— Wamakolha ekyo, iwangana thunga etseme nene omwa ngebe, nga Timoteo kw’akolha!