Okwa bundi buthuku abandu bakanathusekereraya kutse ibathukwa kw’ekinigha thukababwira oku Yehova. Eki kyanganaleka ithwanza erileka erikania oku Nyamuhanga. Wune wathayowa wuthya?— E Biblia yikathubwira okwa mulhwana oyuwabya anzire Yehova, aliriryo abya iniakayaleka erimukaniako. Erina liwe abya in’iyo Yeremia. Thuthamwighako.

Omughulhu Yeremia abya mulhwana, Yehova mwamubwira athi abwire abandu athi baleke erikolha ebindu bibi. Eki mukyakalira Yeremia, kandi mwasagha. Mwabwira Yehova athi: ‘Singasi ebya nanga bugha. Indi mulhwana mulere.’ Aliriryo Yehova mwamubwira athi: ‘Siwukwe buba. Ngendikuwathikya.’

 Neryo Yeremia mwatsuka eribwira abandu athi bathethahindulha emibere yabu bakendi syasuyirwa kutse erihebwa ekifubiro. Wukalengekanaya abandu mubanakolha ekya Yeremia abugha?— Eyihi. Mubamusekererya n’abandi bamamukwa kw’ekinigha. Abandi nibya mubanza erimwitha! Wukalengekanaya Yeremia mwayowa athi?— Mwakwa obuba neryo amabugha athi: ‘Singendi thasyakania oku Yehova.’ Aliriryo kwenene mwanaleka?— Eyihi, mwathaleka. Abya anzire Yehova ya kutsibu erihika okw’ibya isyangaleka erimukaniako. Kundi Yeremia mwathaleka, Yehova mwamutheya.

Ng’eky’erileberyako, kiro kighuma abandu babi mubaghusa Yeremia y’omwa kyuna kiri ekyoswire mw’ebyondo. Syabya awithe eky’erirya kutse amaghetse. Abandu aba banza erimusigha mukyo anaholha. Aliriryo Yehova mwamuwathikya erikilhuamu!

Eky’erileberyako kya Yeremia kikakweghesayaki?— Nomwakine indi iniakanakwa obuba, mwathaleka erikania oku Yehova. Omughulhu wukakanaya oku Yehova, abandi bangana kusekererya kutse erikukwa kw’ekinigha. Wangana yowa nga wabirihemuka kutse iwasagha nibya. Aliriryo isiwaleka erikania oku Yehova. Akendi kuwathikya mughulhu wosi, ngoku anawathikaya Yeremia.