Kikana kwolhobera eriowa ababuthi bawu buli kiro?— Hakanayira ikyakalha. Wunasi ngoku Yesu abya akowa Yehova n’ababuthi biwe?— Eky’erileberyako kiwe kyangana kuwathikya eriowa ababuthi bawu n’omughulhu kyanga kukalira. Leka thuth’igha bingyi okw’eki.

Yesu athali asa okwa kihugho, abya iniane na Thatha wiwe, Yehova, elhubulha. Aliriryo kandi n’okwa kihugho, Yesu mwathunga ababuthi. Amena wabu abya Yozefu na Maria. Wunasi nga mubabya bathi babuthi biwe?—

Yehova mwahira Yesu y’omw’ibunda lya Maria erilhua elhubulha nuku abuthirawe okwa kihugho ng’olhumekeke. Eki kyabya kithiko-thiko! Yesu mwakulira omw’ibunda lya Maria ng’abandi baana ku bakanakulira omwa mabunda w’abamama wabu. Habere hahwa mezi nga mwenda, Yesu amabuthwa. Maria na mwira wiwe Yozefu ku babya babere bathya babuthi ba Yesu okwa kihugho.

Omughulhu Yesu abya awithe myaka 12 misa, mwakolha ekindu ekya kanganaya ngoku anzire Thatha wiwe, Yehova, ya kutsibu. Eki kyabya omughulhu Yesu n’ab’eka yabu baghenda lhughendo lhuuli bakaya e Yerusalemu okwa kiro kikulhu ky’Erikyuruka. Babere bane omwa nzira bakalhuayo, Yozefu na Maria bamalhangira Yesu isyali nabu. Wunasi ng’abya hayi?—

Esaha eyo Yozefu na Maria mubabinduka erisuba e Yerusalemu n’erirondya Yesu ehosi-hosi. Mubakwa obuba kundi mubathamubana. Aliriryo habere hahwa biro bisathu ibane mumusondya, mubamweya omwa Hekalu! Wunasi ekyaleka Yesu iniaya omwa Hekalu?— Kundi omo mw’abya iniakendighira oku Thatha wiwe, Yehova. Abya anzire Yehova kandi abya anzire erigha ngoku anga mutsemesya. Yesu nomwanakulha eribya mulhume mukulhu, iniakowa Yehova. Yesu iniakakolha eki n’omughulhu kikalire, nibya nomukyangabya ikikendi lhwiririramu eriaghalhwa. Yesu mwanabya mwowa n’oku Yozefu na Maria?— Ee, e Biblia yikabugha yithi iniakabowa.

Eky’erileberyako kya Yesu kikakweghesayaki?— Wutholere iwowa ababuthi bawu n’omukyangabya isikikwolhobere. Wune mwendi kolha ekyo?—