Wukalengekanaya kinakalire erikolha ekihikire?— Abandu banene bakalengekanaya bathi kikalire. E Biblia yikathubwira ngoku mukyakalira omulhwana mulere ya Yosia erikolha ekihikire. Aliriryo abya inianawithe abanywani abuwene abamuwathikaya. Thuth’igha oku Yosia n’abanywani biwe.

Thatha wa Yosia abya in’iyo Amoni, omwami we Yuda. Amoni abya mubi kutsibu kandi iniakaramaya esyosanamu. Thatha wa Yosia oyu abere abiriholha, neryo Yosia mwabya mwami we Yuda. Aliriryo abya awithe myaka munani misa! Mbwino nayu mwanabya mubi nga thatha wiwe?— Eyihi, mwathabya mubi!

Nomwanabya mulere kutsibu, Yosia abya anzire erikenga Yehova. Neryo mwathwamu erinywana abandu abanzire Yehova. Mubawathikya Yosia erikolha ekihikire. Ni bahi ababya banywani ba Yosia?

 Omughuma w’okw’ibo abya ini Zefania. Zefania abya muminyereri oyuwabwira abandu be Yuda athi ibakendibana ebitsibu bamaramya esyosanamu. Yosia mwowa ebya Zefania abugha neryo amaramya Yehova butsira esyosanamu.

Owundi munywani wa Yosia abya ini Yeremia. Abya w’emyaka mighumerera n’eya Yosia kandi mubakulira haghuma. Babya banywani kutsibu, kundi n’omughulhu Yosia aholha, Yeremia mwahandika olhwimbo olhw’erikandira Yosia. Yeremia na Yosia mubawathikania erikolha ekihikire n’erikenga Yehova.

Eky’erileberyako kya Yosia kikakweghesayaki?— Yosia nomwanabya mwana mulere, mwanza erikolha ekihikire. Mwaminya kw’atholere erinywana abandu abanzire Yehova. Wulhangire wuthi wukasombolha abanywani abanzire Yehova abanga kuwathikya erikolha ekihikire!