Nakulira e Puerto Limón, etawuni y’okwa mwalo ebulhua lyuba bw’omwalo we Costa Rica. Ababuthi baghe babya bawithe abaana munani, n’ingye nabya w’omusanju. Thatha waghe aholha ingane w’emyaka munani. Neryo mama mwathukulya iyuwene.

Inganzire ebbesibbolo ya kutsibu. Ingakine mulere iningatsemera omusathu oyu. Iningayalhua omwa obulengwa, munayiyunga okwa timu y’abasathi aba buli kiro. Ingane omwa timu eyo omo myaka yaghe eya 20, omulhume oyukakolha okwa by’erisondya abasi erisatha mwanyisaba athi ng’ingire omwa timu y’abasi ndeke erisatha e Nicaragua. Aliwe kundi okwa buthuku obo mama waghe aby’alhwere kandi ingali w’erimuthwanira, mungathanza eriyikalha e Nicaragua. Neryo munaghana. Enyuma waho, owundi mulhume ng’oyo mwanyisaba athi ngayasathire etimu y’ebbesibbolo ey’erihanga lye Costa Rica, eyabyamu abasathi abasombwerwe erilhua omwa timu eya buli kiro. Lero okwa buthuku obu, munaligha. Munabya omwa timu y’erihanga eritsuka 1949 erihika 1952, kandi muthwasathira e Cuba, Mexico ne Nicaragua ya mirundi mingyi. Munabya musathi nyakabara, nibya iningana satha emirundi 17 isingathahabya nahake. Iningatsema abandu bakabirikira erina lyaghe!

Eky’obulighe, munabya n’omwa ngebe y’obutswatswa. Nomwakine indi nabya inganawithe omusika mughuma oyo thwanzene nayu, mughulhu wosi iningabya ingane n’abandi bakali. Ininganywa obwabu bwa kutsibu. Kiro kighuma munanywa kutsibu indi nabere ingabuka engyakya mungath’ibuka nga ngalyahika eka yindi! Kandi iningasatha n’emisathu y’erisathira esyosente.

Nabere ingane omwa ngebe eyo, mama waghe mwabya Mwema ba Yehova. Mwalengaho erinyibwira okw’ikirirya liwe, aliwe okw’itsuka mwathanyithoka kundi nabya ingabiriyihwerya kutsibu omwa by’emisathu. Esaha y’erirya nomuyangahika, omughulhu indi okw’iyibegheresya, isindikwa enzalha! Amalengekania waghe iniakabya iniali okwa musathu oyo musa. Inganzire ebbesibbolo kwilhaba ekindi kindu kyosi-kyosi!

Aliwe, nabere nahikya myaka 29, munahuthalha kutsibu inganza eriyahamba akapira ithunemusatha. Nabere nabilhama, munaleka erisathira esyotsimu esyasi ndeke. Nomwabine, munabya inganemusangira omwa by’ebbesibbolo omw’ithendeka abasathi ba buli kiro ababya omwa timu y’ahakuhi n’ewaghe.

Omwa 1957, munaligha ekada y’erinyikokya okwa lhuhindano lhunene lhw’Abema ba Yehova olhwabya omwa kisathiro kinene eky’omupira ekya nanasathiremo ebbesibbolo. Ingan’ikere omwa bahulikiriri, iningakwama kya lhangira embaghane eyiri hakathi-kathi k’emibere eyuwene ey’Abema n’emibere mibi eyo nabya ingalhangira omwa bingungu by’abandu okwa misathu y’ebbesibbolo. Ebya nalhangira okwa lhuhindano olho mubyaleka ingatsuka erigha e Biblia n’Abema n’erihindana okwa mihindano yabu.

Munanza esyongangirirya nyingyi sye Biblia esyo n’igha. Ng’eky’erileberyako, Yesu mwalhaghulha athi omwa biro by’enyuma-nyuma, abigha biwe bangathulhughenie engulhu yuwene y’Obwami bwa Nyamuhanga omwa kihugho kyosi. (Matayo 24:14) Kandi munaminya ngoku Abakristayo b’okwenene sibalithuhawa busana n’erikolha omubiiri wabu w’erithulira. Yesu mwabugha athi: “Mwabiryangirira butsira eririha, muhe abandi butsira eririhisya.”—Matayo 10:8.

Nabere ngane mw’igha e Biblia, iningalinganisaya ebya yikabugha n’ebya nalhangira omwa Bema ba Yehova. Munayighomba akaghalha kanene ako bakahiraho erithulhughania engulhu yuwene y’Obwami bwa Nyamuhanga omwa kihugho kyosi. Munabalhangiramu omuthima w’erihithya ogho Yesu abugha athi Abakristayo ibakangania. Neryo nabere nasoma Mariko 10:21 n’erilhangira erikokya lya Yesu erya, “Wase, wunyikwame,” munanza eribya Mwema.

Aliwe muhalhaba obuthuku ingye eriberererya ekyo ndeke. Ng’eky’erileberyako, ahabw’emyaka mingyi obuli wiki ininga sathisaya enamba yaghe “ey’ebbahati” omwa musathu w’erihanga ow’elotare. Aliwe, omwa Biblia munigha ngoku Nyamuhanga akakwa obusu abaramya ‘b’enyamuhanga y’eby’Ebbahati,’ kuthya n’abandu b’omururu. (Isaya 65:11, NWT; Abanya Kolosai 3:5) Neryo munathwamu erileka emisathu y’erisathira esyosente. Ekyasande ky’erimbere nalilekire emisathu y’erisathira esyosente, enamba yaghe “ey’ebbahati” muyasinga! Abandu mubanyisekererya habw’erithendi satha ewiki eyo, kandi mubanyihathikana kutsibu erithasyasatha, aliwe munaghana. Munaleker’ighuma emisathu eyo.

Munabana ekindi kindu ekyalenga okwa mibere yaghe mihya-mihya ekiro nanabatizibawa okwa lhuhindano lhw’Abema ba Yehova. (Abanya Efeso 4:24) Erigholho-gholho eryo, munasuba okwa hotele eyo nabyako neryo muneya omusika oyo thwabya thwanzene nayu iniane okwa lhukyo lhwaghe iniananyilindire. Mwanyisona-sona athi: “Mwanithu Sammy, nganza thuyitsemesaye!” Aliwe aho n’aho munamusubirya indi, “Eyihi!” Munamw’ibukya ngoku lino ngaghendera okwa bihano bye Biblia eby’esyongeso. (1 Abanya Korinto 6:18) Ng’oyusangere mwabugha athi; “Wuthiki?” Neryo mwakania okwa ekya Biblia yikabugha oko myatsi y’engyingo nga ni lhutseghe-tseghe n’erihathikana athi thusubaye obunywani bwethu. Neryo munakwama ky’eringira omwa kisenge kyaghe n’eriyikingiramo. Munabwire, ngatsemire eribugha indi eritsuka aho nabera Mwema omwa 1958, nabiryamakirira buthaleghulha esyombinduka esyonabirikolha omwa ngebe.

Ngayowa inangana handika ekitabu ekihambire okwa mighisa eyo nabiribana busana n’erighendera okwa busondoli bwe Biblia! Emighuma y’okwa mighisa eyo ngwithe lino b’abanywani bangyi ab’okwenene, engebe eyiwithe ekighendererwa, n’etseme y’okwenene.

Ngakinanzire omusathu w’ebbesibbolo, aliwe si ky’ekindu kikulhu lino omwa ngebe yaghe. Omwa musathu oyo munabana obuminywa n’esyosente, aliwe ebindu ebyo mubithamalha. Aliwe obughuma bwaghe na Nyamuhanga n’olhughanda lhw’abalikyethu olhwa ngalimu bikendi syabyaho kera na kera. E Biblia yikabugha yithi: “Ekihugho, n’esyongumbu syakyo, byasyahwa. Nikwa oyukakolha erisonda lya Nyamuhanga asyakotha kera na kera.” (1 Yoane 2:17) Lino nganzire Yehova Nyamuhanga n’abandu biwe kwilhaba ekindi kindu kyosi-kyosi!