Balikyethu Banzwa:

Olhwanzo olhwa thuwithire Nyamuhanga n’abandu lhukathuhira mw’omuhwa ‘w’erighenda n’eriyira abigha oko bihanda byosi; n’eribatizyabo.’ (Mt. 28:19, 20; Mk. 12:28-31) Olhwanzo olhuthemo eriyikukumirira lhuwithe amaaka. Lhwangana hamba okwa mithima y’abawithe “amalengekania awakaleka ibatholera eribana engebe y’erikotha.”—Emib. 13:48, NWT.

Kera, ithukahira omuwatho w’okw’ihambira ebya thwanga bugha by’omwa muthwe n’okw’ighaba ebitabu. Lino thutholere ithuwania emibere yethu y’erikaniraniamo n’abandu. Thwanzire ithwakangania abandi b’olhwanzo omw’ibakanirya okwa myatsi eyikabatsemesaya. Ekyo kikamanyisaya kithi thutholere ithwaghenda-ghendania n’emibere eyiriho n’erilebya ndeke ebiyithawa by’obuli mundu n’ebikamutsemesaya. Ebrokyuwa eno yikendi thuwathikya yithi erikolha ekyo?

Ebrokyuwa eno muli amasomo 12 awakathukangiriraya emibere eya thukayithagha erikulha-kulhania nuku thukanganaye olhwanzo n’eriyira abigha. Obul’isomo liseghemere oko mwatsi we Biblia ogho Yesu kutse owundi muthuli w’enjiri ow’omwa kighana ky’erimbere akanganirayamo omubere mulebe omw’ithulira. Ekilhubirirwa kiri kithi thwanzire ithwasondekania esyonzira sy’erikanganirayamo olhwanzo olhwa thuwithire abandu butsira erihambira ebya thwanga bugha by’omwa muthwe. Nomwakine indi obuli mubere akayithaghisibawa omwa buli mulingo wosi w’erithulira lyethu, thukendi lebya emibere mirebe nga yikayithaghisibawa yithi, kutsibu-tsibu thukatsukisya omukania, thukasubayo, kutse thuk’eghesya abigha be Biblia.

Wukalebya obul’isomo, lengekanaya ndeke nga wanga kangania wuthi omubere mulebe wukakania n’abandu omwa bulhambu bwenyu. Lengaho erikamathya olhwanzo olhwa wuwithire Yehova n’abandu. Olhwanzo olho, kwilhaba eyindi nzira yosi-yosi eya wuwithe ey’erithuliramo, lhw’olhukendi kuwathikya erihika okwa kilhubirirwa kyawu ky’eriyira abigha.

Thukasima olhusunzo lhunene olhw’erikolha haghuma nawu. (Zef. 3:9) Ambi Yehova iniakutsumulha ndeke wunemulholha embere erianza abandu n’eriyira abigha!