E Biblia yikatsuka n’omwatsi w’ebindu erihangikwa, erileka ithwalhangira ebindu bibuya ebya Yehova akolha, omwa lhubulha n’okwa kihugho. Wamabya iwuli mubuthi, wathikaya omwana wawu erilhangira ebindu bingyi kutsibu ebyabirihangikwa. Kanganaya ngoku Nyamuhanga mwahangika abandu ibalengire kutsibu ebisoro, erileka ithwathoka erikania, erighanirya, erikolha ebindu, eriimba, n’erisaba. Muwathikaye alhangire obuthoki n’amenge wa Yehova na kwilhabirirya olhwanzo lhwiwe busana n’ebihangikwa biwe ebyosi​—imwamuli obuli mughuma w’okw’ithwe.