Kiro kighuma, Omwami Nebukadeneza mwalhotha esyonzoli. Musyamutabura kutsibu indi mwathabana n’othulho. Mwabirikira abasaki biwe n’eribabwira athi: ‘Munyisoborere esyonzoli syaghe.’ Mubabugha bathi: ‘Mwami, thubwire ebya walhothire.’ Aliwe Nebukadeneza mwababwira athi: ‘Eyihi! Munyibwire ebyo nalhothire, bithe bithya iningendi bitha.’ Kandi mubabugha nayu bathi: ‘Thubwire ebyo walhothire, neryo thukendi bisoborera.’ Mwabugha athi: ‘Inywe bosi mukanza eriyihambulya. Mumbwire ebyo nalhothire!’ Mubabwira omwami bathi: ‘Sihali mundu oyuwanga kolha ekyo. Ebya wukasaba sibyanga thokekana.’

Nebukadeneza mwahithana kutsibu neryo amahamulha athi abalhume bosi b’amenge bithawe. Imwamuli Danieli, Sadiraki, Mesaki, na Abedenego. Danieli mwasaba omwami athi amuhe endambi. Neryo Danieli n’abanywani biwe mubasaba Yehova n’erimusaba obuwathikya. Ni kyahi ekya Yehova akolha?

Omwa syonzoli, Yehova mwakangania Danieli y’ekilhotho kya Nebukadeneza n’ekya kikamanyisaya. Engyakya eyakwamako, Danieli mwaghenda eyiri omughombe w’omwami n’erimubwira athi: ‘Siwithe omulhume wosi-wosi ow’amenge. Ngendi soborera ekilhotho ky’omwami.’ Omughombe mwathwalha Danieli eyiri Nebukadeneza. Danieli mwabwira omwami athi: ‘Nyamuhanga abirikubisulira eby’obuthuku obukasa. Ekilhotho kyawu kyakino: Muwalhangira esanamu nene, omuthwe wayu ini w’esyamaghetse esitukwire, ekikuba n’amaboko wayu byabya by’ekitsipa, enda yayu n’embindi yayu byabya by’emiringa, emihimbi yayu yabya y’ekyuma, n’ebisando byayu byabya ekitsweka ky’ekyuma n’ekitsweka ky’eribumba. Neryo eribwe mulyalhua okwa kithwe n’eriswirya ebisando by’esanamu. Esanamu eyo muyathulhangika muyabya musunga n’erihunga mulyaghulhukyagho. Eribwe mulyabya kithwe kinene, mukyusulya ekihugho.’

Neryo Danieli mwabugha athi: ‘Ekilhotho kyawu kikamanyisaya: Obwami bwawu w’omuthwe  w’esyamaghetse. Ekitsipa bw’obwami obukendi syakusubuka. Neryo hakendi syabya obundi obuli ng’emiringa obukendi syathabalha ekihugho kyosi. Obundi bwami bukendi syakalha ng’ekyuma. Erighunzerera, hakendi syabya obwami obughabene obuwithe ekitsweka ekiwithe amaaka ng’ekyuma n’ekindi ekitsekire ng’eribumba. Eribwe eryabya kithwe ni Bwami bwa Nyamuhanga. Bukendi syathulhanga amami wosi aya neryo ibwabyaho kera na kera.’

Nebukadeneza mwawa embere sya Danieli, munamya obusu bwiwe okwa kithaka. Mwabugha athi: ‘Nyamuhanga wawu abirikubisulira ekilhotho eki. Sihali Nyamuhanga oyuli ng’iyo.’ Omwakanya k’eritha Danieli, Nebukadeneza mwamuyira mwa mukulhu w’abalhume bosi b’amenge kandi muthabali omwa Babeli. Wanamalhangira Yehova ngoku asubiraya omusabe wa Danieli?