Esiteri abya mumbesa Omuyuda oyuwabya ikere omwa muyi we Persia e Susa. Myaka mingyi enyuma, Nebukadeneza abya iniabiriheka ab’oku Esiteri ng’abanyewa erilhua e Yerusalemu. Mwakulibwa na mughalha wabu iya Mordekayi, omughombe w’Omwami Ahasuero owe Persia.

Omwami Ahasuero mwanza owundi nyabaghole. Abaghombe biwe mubamulethera abakali ababuya bosi, imwamuli na Esiteri. Omwa bakali abosi, omwami mwasombolha Esiteri eribya nyabaghole. Mordekayi mwabwira Esiteri athi isyabisulha ku ni Muyuda.

Omulhume w’emiyiheko oyukahulhawa mwa Hamani yuwabya mukulhu w’abanya-mwami abosi. Abya anzire obuli mundu iniamunamira. Mordekayi mwaghana, neryo Hamani mwahithana kutsibu amanza erimwitha. Hamani abere abiriminya ngoku Mordekayi ni Muyuda, mwakolha epulani ey’eritha Abayuda abosi. Mwabwira omwami athi: ‘Abayuda ni babi; wutholere iwabitha.’ Ahasuero mwabugha athi: ‘Wukole ekyosi-kyosi ekya wanzire erikolha,’ kandi mwamuha obuthoki bw’erihiraho ekilhaghiro. Hamani mwahiraho ekilhaghiro ekikahamulha abandu erisy’itha Abayuda abosi ebiro 13 okwezi okwa Adari. Yehova abya inianasamalire.

Esiteri abya isyasi okwa kilhaghiro ekyo. Neryo Mordekayi mwamuthumira ekopi y’ekilhaghiro ekyo n’erimubwira athi: ‘Wughende wukanaye n’omwami.’ Esiteri mwabugha athi: ‘Omundu wosi-wosi oyukahikerera omwami isyathabirikirwa ak’ithibawa. Hamabirilhaba biro 30 omwami isyali ambirikira! Aliwe ngendi ghendayo. Amanyisumbira omutso wiwe, iningendi lhama. Aliwe amathendi sumbagho, iningend’ithibwa.’

Esiteri mwaghenda omwa kikali ky’omwami. Omwami abere akamulhangira, mwamusumbira omutso wiwe. Esiteri mwaya eyiri omwami, n’omwami mwabugha athi: ‘Ngakukolereki, Esiteri?’ Esiteri  mwabugha athi: ‘Nganza eribakokya okw’irya, iwe na Hamani.’ Babere bane okw’irya, Esiteri kandi mwa bakokya okw’irya eryakabiri. Okw’irya eryakabiri, omwami mwabulya Esiteri kandi: ‘Ngakukolereki?’ Mwabugha athi: ‘Hali omundu oyukendi nyitha n’abandu bethu. Kisi wuthulhamaye.’ Omwami mwabulya athi: ‘Oyukanza erikwitha nindi?’ Esiteri mwabugha athi: ‘Omulhume mubi oyu ya Hamani.’ Ahasuero mwahithana kutsibu neryo mwahamulha athi Hamani ithawe aho n’aho.

Aliwe sihabya mundu oyuwanga hindulha ekilhaghiro kya Hamani, nomwangabya n’omwami. Neryo omwami mwayira Mordekayi mwa mukulhu w’abanya-mwami n’erimuha obuthoki bw’erihiraho ekindi kilhaghiro ekihyaka. Mordekayi mwahiraho ekilhaghiro ekyahamulha Abayuda eriyilhwirako bamabambirwa. Okwa kiro kye 13 okwezi kwa Adari, Abayuda mubakinda esyonzighu syabu. Erilhwiririra n’aho, mubabya bak’ibuka erisingura eri obuli mwaka.