Yehova mwasombolha Yeremia eribya muminyereri w’abandu be Yuda. Mwamubwira athi athulire abandu n’eribakunga athi baleke erikolha ebindu bibi. Yeremia mwabugha athi: ‘Yehova, ngali mulhwana. Singasi erikania n’abandu.’ Yehova mwamubwira athi: ‘Siwubahe. Ngendi kubwira eby’eribugha. Ngendi kuwathikya.’

Yehova mwabwira Yeremia athi wuhindanaye abakulhu b’abandu, wanathulhanga ekibindi embere syabu n’eribugha wuthi: ‘E Yerusalemu yikendi thulhangwa ng’eki.’ Yeremia abere akakolha ngoku Yehova anabugha, abakulhu mubahithana kutsibu. Omuhereri iya Pasuri mwaswirya Yeremia n’eriboha amaboko n’amaghulhu wiwe omwa bisayi by’esyombaho. Omwa kiro ekyosi, Yeremia abya isyanga thoka erighenda. Pasuri mwamulhusyamu engyakya eyakwamako. Yeremia mwabugha athi: ‘Sinangathasya thoka eki. Ngendi bikyako eby’erithulira.’ Aliwe kwenene mwanabikyako? Eyihi. Yeremia abere akathasya kirengekaniako, mwabugha athi: ‘Omwatsi wa Yehova ali ng’omuliro omw’ingye. Sinanga leka erithulira.’ Yeremia mwalholha embere erikunga abandu.

Emyaka muyalhaba, kandi muhabya omwami muhya e Yuda. Abahereri n’abaminyereri b’amabehi mubapona omwatsi wa Yeremia. Mubabwira abanya-mwami bathi: ‘Omulhume oyu atholere iniakwa.’ Yeremia mwabugha athi: ‘Mwamanyitha, imukanyithira busa. Ngabugha ebinywe bya Yehova, butsira ebyaghe.’ Abanya-mwami babere bakowa ebyo, mubabugha bathi: ‘Omulhume oyu syatholere erikwa.’

Yeremia mwalholha embere erithulira, kandi abanya-mwami  mubahithana. Mubasaba omwami eritha Yeremia. Omwami mwababwira athi bangana kolha ekyosi-kyosi ekya banzire erikolha oku Yeremia. Mubimya Yeremia n’erimughusa omwa kyuna kiri ekiri mw’ebyondo, ibanasi bathi akendi holeramu. Yeremia mwatsuka erithobera omwa byondo.

Neryo omukulhu iya Ebedimeleki mwabwira omwami athi: ‘Abanya-mwami babirighusa Yeremia y’omwa kyuna! Thwamamulekamu iniakendi holha.’ Omwami mwahamulha Ebedimeleki erithwalha abalhume 30 eriyalhusya Yeremia y’omwa kyuna. Mbwino sithwangabya nga Yeremia, oyuwathalighira ekindu kyosi-kyosi erimukakirya okw’ithulira?