Omughulhu Nebukadeneza athwalha abanya-mwami be Yuda e Babeli, mwabahira omwa butheya bw’omukulhu ow’omw’ibughiro iya Aspenazi. Nebukadeneza mwabwira Aspenazi athi basondaye abalhwana b’amaghalha awuwene kandi abawithe menge manene. Abalhwana aba bangathendekirwe habw’emyaka isathu. Erithendekwa eri lyanga batheghekere eribya bahani bakulhu omwa Babeli. Abalhwana mub’igha erisoma, erihandika, n’eribugha omubughe w’Akadia owe Babeli. Kandi babya batholere ibabya bakalya oko byalya by’omwami n’abakulhu. Abbani b’okwa balhwana ini Danieli, Hanania, Misaeli, na Azaria. Aspenazi mwabaha awandi mena mahyaka awe Babeli: Beltesaza, Sadiraki, Mesaki, na Abedenego. Mbwino  erithendekwa eri lyangana bakakirye erikolera Yehova?

Abalhwana bbani aba babya ibabirithwamu eriowa Yehova. Babya ibanasi ku sibatholere bakalya okwa byalya by’omwami kundi Emighambo ya Yehova yabya yikabugha yithi ebindi byalya by’okw’ibyo sibitholere eriribwa. Neryo mubabwira Aspenazi bathi: ‘Kisi si wuleke thukalya okwa byalya by’omwami.’ Aspenazi mwababwira athi: ‘Mwamathendirya neryo omwami akalhangira imwabiribya ng’abalhwere, iniakendi nyitha!’

Danieli mwaha amenge. Mwabwira omutheya wabu athi: ‘Kisi wuthuhe esyonyinyi nyisa n’amaghetse habw’ebiro ikumi. Neryo wanathulebya haghuma n’abalhwana abakalya oko byalya by’omwami.’ Omutheya mwaligha.

Ebiro ikumi byabere byahwa, Danieli n’abandi banywani biwe mubabya n’amaghalha awuwene kwilhaba abandi balhwana. Yehova mwatsema kundi mubamowa. Kandi mwaha Danieli y’amenge w’eriyitheghererya esyonzoli n’ebilhotho.

Erithendekwa lyabere likahwa, Aspenazi mwaletha abalhwana eyiri Nebukadeneza. Omwami mwakania nabu kandi mwalhangira Danieli, Hanania, Misaeli, na Azaria ibawithe amenge kandi ibakayitheghereraya lhuba kwilhaba abandi balhwana. Mwasombolha abbani aba erikolera omwa kikali kiwe. Mughulhu mungyi omwami iniakabasaba amenge okwa myatsi mikulhu. Yehova abya iniabiribakolha mwa b’amenge kutsibu kwilhaba abalhume bosi b’amenge n’abalhaghuli b’omwami.

Nomwakine indi babya omwa kihugho ekithe kyabu, Danieli, Hanania, Misaeli, na Azaria mubathibirirwa ngoku ni bandu ba Yehova. Nawu iwunemwendibya iwun’ibukire Yehova, wamabya isiwuli ahali ababuthi bawu?