Obuthuku mubwahika, Belsasari mwabya mwami we Babeli. Kiro kighuma, mwakokya abakulhu-bakulhu bangyi okw’irya. Mwahamulha abaghombe biwe eriletha ebikopo by’ehoro ebya Nebukadeneza alhusaya omwa hekalu ya Yehova. Belsasari n’abagheni biwe mubanywira omwa bikopo ebyo kandi mubapipa esyonyamuhanga syabu. Isibayitsulirye, ebyalha by’omundu mubyahandika ebinywe by’obukisu okwa lhuhimbo lh’omwa diro.

Belsasari mwakwa obuba. Mwabirikira abakumu biwe n’eribalhaghanisya athi: ‘Hamabanika oyukasoborera ebinywe ebyo, iningendi muyira mw’omuthabali wakasathu omwa Babeli.’ Mubalengesya, aliwe muhathabanika oyukathoka eribisoborera. Omwami-kali mwasa n’eribugha athi: ‘Hane omulhume oyukahulhawa mwa Danieli oyuwabya akakumbulira Nebukadeneza y’emyatsi. Nawu angana kukumbulira ebinywe ebi.’

Danieli mwasa eyiri omwami. Belsasari mwabugha nayu athi: ‘Wamasoma n’erisoborera ebinywe ebi, iningendi kuha ekikwangyi ky’ehoro n’erikuyira mw’omuthabali wakasathu omwa Babeli.’ Danieli mwabugha athi: ‘Singanzire ebihembo byawu, aliwe ngendi kubwira ebinywe byo ngabikamanyisayaki. Thatha wawu Nebukadeneza abya akayiheka, neryo Yehova mwamukehya. Wunasi ebyosi ebya mubyako, aliwe siwuthasikya Yehova omw’inywira obwabu omwa bikopo by’ehoro ebya lhusibawa omwa hekalu Yiwe. Neryo Nyamuhanga mwakahandika ebinywe ebi: Mene, Mene, Tekel, na Parsin. Ebinywe ebyo bikamanyisaya bithi Abamedi n’Abaperesi bakendi kinda e Babeli, kandi siwendi syasabya mwami.’

Ikikabya nga sihali oyukendi syakinda e Babeli. Omuyi oyu abya atheghibirwe n’esyombimbo esighumire n’olhusi lhunene. Aliwe omwa kiro ekyo, Abamedi  n’Abaperesi mubaghotheragho. Omwami we Persia iya Kiro mwahumya olhusi nuku abasirikali biwe bangahika okwa syonyukyo sy’omuyi. Babere bahikakugho, esyonyuyi syabya isinakyungwire! Abasirikali mubingira, mubahamba omuyi n’er’itha omwami. Neryo Kiro mwabya mwami we Babeli.

Omo mwaka mughuma, Kiro mwabugha athi: ‘Yehova abirinyibwira athi ngahimbe ehekalu yiwe e Yerusalemu. Owosi-wosi oyuwanzire eriwathikya ali bwiranda erighendayo.’ Ngoku Yehova abya iniabirilhaghanisya, Abayuda bangyi mubasubayo enyuma w’emyaka 70 e Yerusalemu yalithoghothibirwe. Kiro mwasubulya ebikopo by’ehoro n’omulinga ebyo Nebukadeneza abya iniabiriheka omwa hekalu. Wanamalhangira Yehova ngoku akolesaya Kiro eriwathikya abandu biwe?