Mirundi mingyi, abandu be Yuda mubasighania Yehova bamaramya esyonyamuhanga sy’amabehi. Ahabw’emyaka mingyi, Yehova iniakabera erilengaho eribya iniane mubawathikya. Yehova mwathuma abaminyereri bangyi eribakunga, aliwe mubathahulikirira. Omwakanya k’ekyo, ibakasekereraya abaminyereri. Yehova mwaghunzaho athi eriramya lyabu ly’esyosanamu?

Omwami we Babeli iya Nebukadeneza, abya iniane mukinda ebihanda bingyi. Abere akakinda e Yerusalemu omurundi w’erimbere, mwahamba Omwami Yoyakimu, abanya-mwami, abalhwi mbangyi, n’ababatsi, neryo abosi amabathwalha e Babeli. Kandi mwathwalha n’ebindu by’obughuli ebyosi eby’ehekalu. Neryo Nebukadeneza mwayira Zedekia mo mwami we Yuda.

Okw’itsuka, Zedekia abya akowa Nebukadeneza. Aliwe ebihanda ebya hakuhi ne Yuda n’abaminyereri b’amabehi mubabwira Zedekia bathi ayisamambule oku Babeli. Yeremia mwamukunga athi: ‘Wamabiriyisamambulha, omwa Yuda imukendibya obwithi, enzalha, n’amalhwere.’

Zedekia abere abirithabalha habw’emyaka munani, mwathwamu eriyisamambulha oku Babeli. Mwasaba amahe we Misiri erimuwathikya. Neryo Nebukadeneza mwathuma amahe wiwe eriyahamba e Yerusalemu n’erithimba okwa muyi wosi. Yeremia mwabwira Zedekia athi: ‘Yehova akabugha athi wamayighemulira oku Babeli, iwe n’omuyi imukendi lhama. Aliwe wamathendi yighemulha, Abanya Babeli ibakendi hisya e Yerusalemu neryo ibabathwalha mwa banyewa.’ Zedekia mwabugha athi: ‘Sinendi yighemulha!’

 Habere halhaba mwaka mughuma n’embindi, amahe we Babeli mwatuhura esyombimbo sy’omuyi we Yerusalemu n’eringiramu kandi amahisyagho. Mubahisya ehekalu, bam’itha abandu bangyi, n’erithwalha esyongumi sy’abandu mwa banyewa.

Zedekia mwatswa e Yerusalemu, aliwe Abanya Babeli mubamuthibithako. Mubamuhambira hakuhi ne Yeriko neryo bamamulethera Nebukadeneza. Omwami we Babeli mwaleka Zedekia alhangire abaghalha biwe ku bak’ithibawa. Neryo Nebukadeneza mwayira Zedekia mwa ndimethime n’erimuhira omwa ngomo, eyo aholera. Aliwe Yehova mwalhaghanisya abandu be Yuda athi: ‘Enyuma we myaka 70, ngendi baletha eka wenyu e Yerusalemu.’

Ni kyahi ekyangabere okwa balere ababya ibabirithwalhwa e Babeli ng’abanya ngomo? Mbwino bangana sighere bathaleghulha oku Yehova?