Omwa kihugho ky’ebulhua-lyuba bwe Israeli mwabya abandu ababya bikirirye bathi esyongununu syangana basondolha. Kiro kighuma, abalhume erilhua Ebulhua-lyuba mubalhangira engununu eyikakoleraya kutsibu iyine mughenda oko lhubulha, neryo mubakwamayo. “Engununu” muyabalholya e Yerusalemu. Abalhume mubatsukiraho eribulya abandu bathi: ‘Omwana oyukendisyabya mwami w’Abayuda ali hayi? Thwamasa erisyamunamira.’

Neryo Herode, omwami we Yerusalemu abere akowa okwa mwami muhya oyu, mwayilhalikirira. Herode mwabulya abahereri bakulhu athi: ‘Omwami oyu akendi buthirwa hayi?’ Mubamubwira bathi: ‘Abaminyereri mubabugha bathi akendi syabuthirwa e Betelehemu.’ Neryo Herode mwabirikira abalhume abo n’eribabwira athi: ‘Mughende e Betelehemu musondaye omwana oyo. Musubule mumbwire aho mwana oyo ali. Nganzire erimunamira.’ Aliwe ayo abya mabehi.

Kandi “engununu” muyatsukiraho erighenda. Abalhume mubakwamayo eriya e Betelehemu. “Engununu” muyasa n’erisyimana eyighulhu okwa nyumba neryo abalhume mubingira omwa nyumba eyo. Mubasanganamu Yesu na mama wiwe, Maria. Mubunamira omwana n’erimuha ebihembo by’ehoro, obukwa n’emanemane. Mbwino Yehova yuwathuma abalhume aba erisondya Yesu? Eyihi.

Omwa kiro ekyo, Yehova mwabwira Yozefu omwa nzoli athi: ‘Herode akanza eritha Yesu. Hangana wimaye mukali wawu n’omwana wawu muthibithe e Misiri. Mwikale eyo erihika aho ngendi syakubwirira indi musubule.’ Aho n’aho, Yozefu n’eka yiwe mubaghenda e Misiri.

Yehova abya iniabiribwira abalhume abo athi sibasube eyiri Herode. Herode abere akaminya ngoku abalhume sibendi thasyasuba eyo ali, mwahithana kutsibu. Kundi abya isyangathasyabana Yesu, mwahamulha athi abaana b’obulhume abali omo myaka ya Yesu e Betelehemu b’ithawe. Aliwe Yesu abya iniane ndeke, haali e Misiri.

 Enyuma waho, Herode mwaholha. Yehova mwabwira Yozefu athi: ‘Lino wangana subayo.’ Yozefu, Maria na Yesu mubasuba e Israeli, neryo mubikalha omwa muyi we Nazareti.