Yozefu na Maria, na Yesu n’abaana babu b’obulhume na b’obukali mubikalha e Nazareti. Yozefu mwasighika eka yiwe omw’ikolha omubiiri w’eribatsa, kandi mwabakangirirya oku Yehova n’Emighambo yiwe. Mughulhu wosi ibakaghenda omwa sinagogi eriyaramya kandi obuli mwaka ibaghenda e Yerusalemu oko Kiro ky’Erikyuruka.

Yesu abere akahikya myaka 12, ab’eka yabu mubaghenda e Yerusalemu ngoku bakanakolha. Omuyi oyo mwabya imwabiryusulha abandu bangyi abasyibuka Ekiro ky’Erikyuruka. Enyuma waho, Yozefu na Maria mubatsuka olhughendo lhw’erisuba eka, ibanasi bathi Yesu ane n’abandi. Neryo babere bamusondya omwa bahughu, mubathamubana.

Mubasuba e Yerusalemu, mubaghunza biro bisathu ibane musondya omwana wabu. Erighunzerera, mubaghenda omwa hekalu. Yesu abya inianikere ahakathi-kathi k’abakangirirya, inianemuhulikirira ndeke n’eribabulya ebibulyo ebyuwene.  Abakangirirya mubatsemera Yesu neryo mubatsuka erimubulya ebibulyo. Kandi mubasweka busana n’erisubirya liwe. Mubalhangira ngoku akayitheghereraya Emighambo ya Yehova.

Yozefu na Maria babya ibabiryubaha. Maria mwabugha athi: ‘Mwana waghe, thwabirikusondya ehosi-hosi! Wulhue hayi?’ Yesu mwabugha athi: ‘Simwasi ku ngatholere eribya hano omwa nyumba ya Thatha waghe?’

Yesu mwasuba eka n’ababuthi biwe e Nazareti. Yozefu mwakangirirya Yesu omubiiri w’eribatsa. Wukalengekanaya Yesu abya mundu oyuli athi iniakine mulhwana mulere? Abere ane mukulha, Yesu mwabya n’amenge kandi mwasimwa na Nyamuhanga n’abandu.