Yesu abere abiribatizibwa, omulimu abuyirire mwamusondolha omo mbwarara. Mwaghunza biro 40 isyali athalya, neryo mwakwa enzalha. Sitani mwasyamulengako athi: ‘Wamabya kwenene iwuli Mughalha wa Nyamuhanga, bwira amabwe aya wuthi abye muggati.’ Aliwe Yesu mwasubirya Sitani omw’ikolesya Amasako athi: ‘Kisakire kithi thukayithagha ekilengire ebyalya erithoka eribyaho. Thutholere ithwahulikirira obuli kinywe ekya Yehova akabugha.’

Kandi, Sitani mwalenga oku Yesu athi: ‘Wamabya kwenene iwuli Mughalha wa Nyamuhanga, yighuse ahisi. Kihandikire kithi abamalaika ibakendi kubaghalira.’ Aliwe kandi Yesu mwakolesya Amasako athi: ‘Kisakire kithi isiwalenga oku Yehova.’

Kandi, Sitani mwakangania Yesu y’amami wosi w’ekihugho n’olhukengerwa lhwawu athi: ‘Ngendi kuha amami wosi ayo n’olhukengerwa lhwawu wamanyikukamira n’erinyiramya.’ Aliwe Yesu mwabugha athi: ‘Wulhuaho, Sitani! Kisakire kithi wasyaramya Yehova musa.’

Sitani mwayighendera, n’abamalaika mubasa, bamaha Yesu y’ebyalya. Erilhwiririra naho, Yesu mwathulhughania engulhu yuwene y’Obwami. Abya iw’omubiiri ow’asyakolha okwa kihugho. Abandu mubanza ebya Yesu abakangiriraya, kandi ibakamukwama ehosi-hosi.