Abafarisayo babya baponire Yesu kandi mubanza babane enzumwa eyangaleka ibamuhamba. Mubabugha bathi isyalhamaya abalhwere okwa Sabato. Okwa Sabato nguma, Yesu mwasangana omulhume oyuwabuthawa mwa ndimethime iniane musabirirya okwa nzira. Yesu mwabwira abigha biwe athi: ‘Mulhangire ngoku obuthoki bwa Nyamuhanga bukendi wathikya omulhume oyu.’ Yesu mwahira amathande wiwe w’omwa hithaka amakolha ehyondo, neryo mwahirahyo okwa meso w’omulhume oyo. Yesu mwabwira omulhume athi: ‘Ghenda wunabe omwa meso omwa kitsinga kye Siloamu.’ Omulhume mwayakolha ekyo, neryo mwatsukiraho erilhangira.

Abandu mubasweka. Mubabugha bathi: ‘Oyu ya na mulhume oyuwabya akikalha n’erisabirirya, kutse ni wundi amusosire?’ Omulhume mwabugha athi: ‘Nina ngye!’ Abandu mubamubulya bathi: ‘Busana naki si wukiri ndimethime?’ Omulhume abere ababwira ebyabere, mubamuthwalha eyiri Abafarisayo.

Omulhume mwabwira Abafarisayo athi: ‘Yesu mwakahira ehyondo okwa meso waghe n’erinyibwira athi ngaghende nganabe omwa busu. Munakolire ekyo, neryo lino nabirilhangira.’ Abafarisayo mubabugha bathi: ‘Yesu amabya iniakalhamaya okwa Sabato, kwesi obuthoki bwiwe sibulilhua oku Nyamuhanga.’ Aliwe abandu mubabugha bathi: ‘Obuthoki biwe bwamabya isibulilhua oku Nyamuhanga, isyanga thokire erilhamya.’

Abafarisayo mubabirikira ababuthi b’omulhume n’eribabulya bathi: ‘Kikathokekana kithi indi omwana wenyu lino akalhangira?’ Ababuthi biwe mubakwa obuba kundi Abafarisayo ibabiribugha bathi oyukendi syikirirya Yesu akendi syalhusibwa omwa sinagogi. Neryo ababuthi bathi: ‘Sithwasi. Mumubulhaye.’ Abafarisayo mubabulya omulhume y’ebibulyo bingyi erihika aho abughira athi: ‘Nabiribabwira ebyo ngasi. Busana naki mukinanyibulhaya?’ Abafarisayo mubahithana, neryo mubamughusa eyihya.

Yesu mwayabana omulhume oyo n’erimubulya athi: ‘Wunikirirye Masiya?’ Omulhume mwabugha athi: ‘Ngananzire inga mwikirirya, namaminya iyo nga nindi.’ Yesu mwabugha athi: ‘Ingye indi Masiya.’ Wanamalhangira olhukeri olhwa Yesu akanganaya? Mwathalhamya omulhume lisa aliwe kandi mwamuwathikya eribya n’erikirirya.