Yesu aby’awithe abanywani biwe basathu ababya bikere e Betania. Babya Lazaro n’abali babu babiri, iya Maria na Marata. Kiro kighuma, Yesu iniane eyisirya we Yorodani, Maria na Marata mubamuthumira omwatsi wa lhuba-lhuba bathi: ‘Lazaro alhwere kutsibu. Kisi wase lhuba!’ Aliwe Yesu mwathalhuaho akaghenda. Mwalinda ebindi biro bibiri neryo mwabwira abakwenda biwe athi: ‘Muyire thughende e Betania. Lazaro aghotsere ngaya mubukaya.’ Abakwenda mubabugha bathi: ‘Lazaro amabya aghotsere, ekyo kikendi leka iniabya ndeke.’ Neryo Yesu mwababwira ndeke-ndeke athi : ‘Lazaro abiriholha.’

Yesu abere ahika e Betania, Lazaro abya iniamabirighunza biro bbini ali tsikirwe. Abandu bangyi ibabirisyahumulikania Marata na Maria. Marata abere akowa ngoku Yesu anemwasa, mwanguha eriyamuthangirira. Marata mwabugha athi: “Mukama, kumbe wabya hano, mughalha wethu ngasyalithaholha.” Yesu mwabwira Marata athi: ‘Mughalha wenyu asyasuba. Wunikirirye ekyo, Marata?’ Marata mwabugha athi: ‘Ngikirirye indi akendi syasuba okw’ilhubuka.’ Yesu mwabwira Marata athi: “Ingye indi lhubuka n’engebe.”

Neryo Marata mwaghenda eyiri Maria n’erimubwira athi: ‘Yesu amasa.’ Maria mwanguha eyiri Yesu, n’abandu mubamukwama. Maria mwawa ahisi okwa bisandu bya Yesu, inianemulira. Maria mwabugha athi: ‘Mukama, kuwabya hano, ambi mughalha wethu aneho!’ Yesu mwalhangira obulighe obwa Maria alimu neryo nayu mwatsuka eririra. Abandu babere bakalhangira emisonia ya Yesu, mubabugha bathi: ‘Mulhangire ngoku Yesu abya anzire Lazaro.’ Aliwe abandi mubayibulya bathi: ‘Busana naki mwathethalhamya munywani wiwe?’ Ni kyahi ekya Yesu aby’akolire?

Yesu mwaghenda ahali eyisinda, okwabya kuthekire eribwe linene okwa bwingiriro. Mwalhaghira athi: ‘Mulhusaye h’eribwe.’ Marata mwabugha athi: ‘Hamathakya biro bbini! Ali mubeha.’ Aliwe mubalhusya h’eribwe, na Yesu mwasaba athi: ‘Thatha, wasingya erinyowa. Nganasi ku wukanyowa ebiro byosi, aliwe ngabugha n’omulenge munene nuku  abandu aba banga minya ku wanyithuma.’ Neryo Yesu mwabirikira n’omulenge munene athi: “Lazaro, hulhuka!” Ekindu ekikaswekaya mukyabya: Lazaro mwalhua omw’isinda, inianasenga-sengire omwa lhukimba. Yesu mwabugha athi: “Mumusengule aghende.”

Abangyi abalhangira eki kikabya mubikirirya Yesu. Aliwe abandi mubaghenda bamayabwira Abafarisayo. Erilhwiririra n’aho, Abafarisayo mubanza eritha Lazaro na Yesu. Omughuma w’okwa bakwenda 12, iya Yuda Iskariota, mwaghenda bubiso-biso eyiri Abafarisayo n’eribabwira athi: ‘Mwanga nyiha singahi namabawathikya eribana Yesu?’ Mubalighirana nayu erimuthuha ebihandi 30 by’efeza, neryo Yuda mwatsuka erisondekania ngoku anga wathikya Abafarisayo erihamba Yesu.