Buthuku buke Ekiro Kikulhu ky’Erikyuruka ikikayabya omo mwaka owa 32 E.K., abakwenda mubalhua omw’ithulira. Babya ibabirilhuha, neryo Yesu mwabathwalha e Betesaida omo bwathu, eriyalhuhuka. Aliwe obwathu bwabere bukahika okwa musike w’engetse, Yesu mwalhangira abandu banene ibanabakwamire. Nomwakine indi Yesu aby’anzire eribya iyuwene n’abakwenda biwe, mwangirira ndeke abandu. Mwalhamya abalhwere babu kandi mwatsuka eribakangirirya. Ekiro kyosi, Yesu mwabakangirirya oko Bwami bwa Nyamuhanga. Erigholho lyabere lyahika, abakwenda mubahika oku Yesu n’eribugha bathi: ‘Abandu babirikwa enzalha. Bugha wuthi baghende nuku bayasondaye eky’erirya.’

Yesu mwabugha athi: ‘Sibendi ghenda. Mubahe eky’erirya.’ Abakwenda mubamubulya bathi: ‘Wukanza thughende thuyabaghulire emiggati?’ Filipo, omughuma w’okwa bakwenda mwabugha athi: ‘Nomuthwangabya n’esyosente nene, sithwanga thoka erighulha emiggati eyanga ghunza abandu bangyi aba.’

Yesu mwabulya athi: ‘Thuwithe ebyalya bingahi?’ Anderea mwabugha athi: ‘Thuwithe emiggati ithano n’amahere abiri. Ebi ni bike kutsibu.’ Yesu mwabugha athi: ‘Mumbe emiggati n’amahere.’ Mwabwira abandu athi bikale ahisi okwa bithi abandu athano-athano na kikumi-kikumi. Yesu mwimya emiggati n’amahere, mwasamalira elhubulha n’erisaba. Neryo mwaha abakwenda b’ebyalya, n’abakwenda mubabiha abandu. Abalhume 5,000 n’abakali n’abaana abosi mubalya bamughutha. Enyuma waho, abakwenda mubakuma-kuma ebyasaka, nuku sihabye ebikakwa busa.  Ebithiri 12 by’ebyalya mubya saka! Eki ka kyabya kithiko-thiko ekikaswekaya, kwa bithe?

Abandu mubatsema kutsibu indi mubanza n’erikolha Yesu mo mwami wabu. Aliwe Yesu abya inianasi ngoku si b’obuthuku bwa Yehova erimuyira mo mwami. Neryo mwabwira abandu athi baghende n’eribwira abakwenda biwe athi baghende okwa musirya w’Engetse ye Galilaya. Abakwenda mubaghenda omo bwathu, na Yesu mwaghenda okwa kithwe kw’eyuwene. Busana naki? Kundi anza obuthuku bw’erisaba Thatha wiwe. Yesu nomwanabya awithe bingyi by’erikolha, mwasondya obuthuku bw’erisaba.