Omughulhu Yesu abya n’abakwenda biwe omwa kisenge ky’endatha, mwababwira athi: ‘Inywe bosi mukendi nyisighania.’ Petero mwabugha athi: ‘Ingye eyihi! Abandi nomubanga kusighania, ingye singendi syakusighania.’ Neryo Yesu mwabwira Petero athi: ‘Engokolhome yikendibya yitheyabika, wukendi bugha mirundi isathu wuthi siwunyasi.’

Abasirikali babere bakathwalha Yesu omwa nyumba ya Kayafa, abakwenda ba Yesu abangyi mubathibitha. Aliwe ababiri mubakwama abakathwalha Yesu. Omughuma wa kubo abya ini Petero. Mwaya omwa kibugha ky’enyumba ya Kayafa neryo mwayotha okwa muliro. Omwa kyakakalha, omughombe w’obukali mwalhangira obusu bwa Petero neryo amabugha athi: ‘Nganakwasi! Wanabya wukabya na Yesu!’

Petero mwabugha athi: ‘Eyihi! Singasi n’ebya wukabugha ebyo!’ Petero mwalholha eyiri egeti. Neryo kandi owundi mughombe w’obukali amamulhangira n’eribwira abandu athi: ‘Omulhume oyu anabya akabya na Yesu!’ Petero mwabugha athi: ‘Singasi na Yesu oyo!’ N’omulhume mwabugha athi: ‘Wuli mughuma wa kubo! N’emibughire yawu yikakanganaya ku wuli we Galilaya, nga Yesu.’ Aliwe Petero mwa lhahirya athi: ‘Singamwasi!’

Okwa ndambi eyo, engokolhome muyabika. Petero mwalhangira Yesu akamukebera. Petero mwibuka ebinywe bya Yesu, neryo mwaghenda eyihya mwayalira kutsibu.

Enyuma waho, ab’omw’ibuyiro mubahindana haghuma omwa nyumba ya Kayafa erithondesya Yesu. Babya ibabirisangwa bathwamu eritha Yesu, neryo mubasondya eky’eriyihambulyamo. Aliwe mubathamubanako mwatsi wosi-wosi. Erighunzerera, Kayafa mwabulya Yesu athi: ‘Wuli Mughalha wa Nyamuhanga?’ Yesu mwasubirya athi: ‘Ee.’ Kayafa mwabugha athi: ‘Sithukiyithagha abandi balhangiri. Eri ni tsuma!’ Ab’omw’ibuyiro mubaligha n’eribugha bathi: ‘Omulhume oyu atholere olhuholho.’ Mubamathangulha Yesu, bamamuthwira kw’amathande,  bamaboha obusu bwiwe, n’erimuswirya ibane mubugha bathi: ‘Wamabya iwuli muminyereri, thathubwira oyuwamakuswirya!’

Omw’ithungyi, mubathwalha Yesu y’omw’ibuyiro kandi bamathasyamubulya bathi: ‘Wuli Mughalha wa Nyamuhanga?’ Yesu mwasubirya athi: ‘Mwamabughakyo.’ Neryo mubabana eky’eriyihambulyamo bathi ni mutsumi neryo bamamuthwalha omwa kikali kya Pontio Pilato, omuthabali Omuroma. Mubyathasya ghenda bithi? Leka thulebaye.