Buthuku buke, Yesu ali buthukire okwa bakwenda, Petero mwathwamu erighenda okwa Ngetse ye Galilaya eriyasoha. Toma, Yakobo, Yoane, n’abandi bigha mubaghenda nayu. Mubasoha omw’ithumbi lyosi aliwe mubathasoha n’eyiswe n’enguma.

Omwa ngyakya-ngyakya y’ekindi kiro, mubalhangira omulhume inian’imene okwa musike w’engetse. Mwababirikirako athi: ‘Mwanahambire esiswe?’ Mubamubwira bathi: “Eyihi!” Omulhume mwabugha athi: “Mughuse ebisohi by’okwa lhuhandi lhw’amali olhw’obwathu.” Babere bakolha ekyo, ebisohi mubyosulha mw’amahere manene indi mubabya isibangathasyathoka eribikurira okwa musike. Neryo Yoane mwaminya ngoku omulhume oyo abya ini Yesu neryo mwabugha athi: “Yo Mukama!” Aho n’aho, Petero mwayighusa omwa maghetse amaziha erihika okwa musike. N’abandi bigha mubamukwama omo bwathu.

 Babere bahika okwa musike, mubalhangira omuggati n’amahere ibine okwa muliro. Yesu mwababwira athi balethe okwa mahere wabu nagho bahiregho okwa muliro. Neryo mwabugha athi: ‘Mwase, mulye.’

Babere babirirya, Yesu mwabulya Petero athi: ‘Wunanyanzire kwilhaba erisoha?’ Petero mwabugha athi: ‘Ee, Mukama, wunasi ngoku ngakwanzire.’ Yesu mwabugha athi: ‘Wulisaye ebyana by’esyombuli syaghe.’ Kandi Yesu mwamubulya athi: ‘Petero, wunanyanzire?’ Petero mwasubirya athi: ‘Ee, Mukama, wunasi ngoku ngakwanzire.’ Yesu athi: “Wutheghaye esyombuli syaghe.” Yesu mwabulya omurundi wakasathu. Petero mwayowa nabi. Petero mwabugha athi: ‘Mukama, wunasi emyatsi yosi. Wunasi ngoku ngakwanzire.’ Yesu mwabugha athi: “Wutheghaye esyombuli syaghe.” Neryo mwabwira Petero athi: “Wunyikwame.”