Yesu n’abakwenda biwe mubalhaba omwa musya we Kiduroni bakaya okwa Kithwe ky’Emizeituni. Bwabya omwa kiro kutsibu n’okwezi ini kighoma. Babere bakahika omw’irima lye Getesemane, Yesu mwababwira athi: “Mwikale hano, mutheghaye.” Neryo Yesu mwaya omw’irima mwa hake n’erikukama. Omwa bulhumi bunene, Yesu mwasaba Yehova athi: “Leka erisonda lyawu likoleke.” Neryo Yehova mwathuma omumalaika erisyamughumya. Yesu abere akasuba eyiri abakwenda biwe mweya ibabirighotsera. Mwabugha athi: ‘Mubuke! Eno si ndambi y’erighotsera! Endambi yabirihika ingye erihebwa omwa byalha by’esyonzighu syaghe.’

Aho n’aho, Yuda mwasa n’abandu banene ibane n’emiyali n’emigho. Yuda abya inianasi aho bakendi sangana Yesu kundi Yuda anabya akasa omw’irima eryo. Yuda abya iniabiribwira abasirikali athi akendi minyikalya Yesu. Yuda mwaghenda ahali Yesu n’eribugha athi: ‘Wabukire, Mukangirirya,’ neryo mwamulyatsirira. Yesu mwabugha athi: ‘Yuda, wukanyighoberaya omw’inyilyatsirira?’

Yesu mwaseghera embere n’eribulya ekingungu ky’abandu athi: “Mukasonda-sondandi kwehi?” Mubabugha bathi: “Yesu Omunazareti.” Neryo mwabasubirya athi: “Ningye,” neryo abandu abo mubasuba enyuma n’eriwa ahisi. Kandi Yesu mwabulya abandu abo athi: “Mukasonda-sondandi kwehi?” Kandi mubabugha bathi: “Yesu Omunazareti.” Yesu mwasubirya athi: ‘Mungababwira indi ningye. Muleke abandu aba baghende.’

Neryo Petero abere ayitheghererya ndeke ekiriho, mwahulhukya omuyali n’erithwa okuthwe kwa Malko, omughombe w’omuhereri mukulhu. Aliwe Yesu mwathulha okwa kuthwe kw’omulhume oyo, kwamalhama. Neryo Yesu mwabugha na Petero athi: ‘Hira  omuyali w’omwa lhubo lhwawu. Wamalhwa omwa muyali, iwukendi syakwa omwa muyali.’ Abasirikali mubahamba Yesu n’eriboha amaboko wiwe, n’abakwenda mubathibitha. N’abandu mubathwalha Yesu eyiri Ana, omuhereri mukulhu. Ana mwabulya Yesu neryo amamulebeka omwa nyumba y’Omuhereri mukulhu Kayafa. Aliwe abakwenda mubakolhaki?