Omughulhu omukwenda Yoane abya omwa ngomo okwa kizinga kye Patemo, Yesu mwamukangania omwa syonzoli ebindu 16 ebikendi syabya obuthuku obukasa. Ebilhotho ebi mubyabisulha ngoku erina lya Yehova likendiyirwa mwa libuyirire, ngoku Obwami bwiwe bukendi syasa, kandi ngoku erisonda liwe likendi syabererera okwa kihugho ngoku liri elhubulha.

Omwa nzoli nguma, Yoane mwalhangira Yehova inianikere okwa kithumbi kiwe ky’olhukengerwa n’abakulhu 24 ibanamuthimbireko ibanambithe esyokanzu nyeru-nyeru, n’esyombitha sy’ehoro okwa mithwe yabu. Ekyakakalha ky’ehirabyo n’emilhumo bikalhua okwa kithumbi ekyo. Abakulhu 24 bak’unama embere sya Yehova n’erimuramya. Omwa yindi nzoli, Yoane mwalhangira endeko nene y’abandu abakaramaya Yehova erilhua omwa bihanda, abandu, n’emibughe yosi. Ekyana ky’Embuli, nayu ini Yesu, akabalisaya n’eribathwalha okwa maghetse w’engebe. Enyuma waho, omwa yindi nzoli, Yesu akatsuka erithabalha ng’Omwami elhubulha, haghuma n’abakulhu 24. N’omwa nzoli eyakwamako, Yoane akalhangira Yesu akalhwa n’ekiyoka, oyuli Sitani, n’esyombinga siwe. Yesu akabaghusa okwa kithaka erib’iha elhubulha.

Neryo kandi Yoane akalhangira ekisosekanio ekyuwene eky’Ekyana ky’Embuli n’abandu 144,000 ibanimene okwa Kithwe Sioni. Kandi akalhangira omulaika akaghulhuka omwa kyanya iniane mubwira abandu athi bubahe Nyamuhanga n’erimuha olhukengerwa.

Omwa nzoli eyakwamako, bakalhwa olhuhi lhwe Harmagedoni. Omwa lhuhi olho, Yesu n’amahe wiwe bakakinda omughulhu mubi wa Sitani. Omwa nzoli y’erighunzerera, Yoane akalhangira obughuma obuwene omwa lhubulha n’okwa kihugho. Sitani n’olhubutho lhwiwe bakathoghothibirawa ighuma. Obuli mundu omwa lhubulha n’okwa kihugho bakalhangira erina lya Yehova mw’eribuyirire n’erimuramya iyo musa.