Abakwenda mubakwama ekihano kya Yesu eky’erithulhughania engulhu yuwene okwa bihanda byosi. Omo mwaka 47 E.K., balikyethu e Antiokia mubathuma Paulo na Barnaba omwa lhughendo olhw’eriyathulira. Abathuliri babiri aba ab’omuhwa, mubaghenda omwa Asia Enyike eyosi nge Derbe, Listra, ne Ikonio.

Paulo na Barnaba mubathulira obuli mundu, mbulha ni mughuda kutse mwera, mulere kutse mukulhu. Abandu bangyi mubaligha ekwenene eyihambire oku Kristo. Omughulhu Paulo na Barnaba bathulira iya Sergio Paulo, omuthabali we Kipuro, omukumu mwanza eribakakirya. Paulo mwabwira omukumu athi: ‘Yehova akendi kusuyira.’ Aho n’aho, omukumu mwabya ndimethime. Omuthabali Sergio Paulo abere akalhangira ekyamabya eki, mwikirirya.

Paulo na Barnaba mubathulira ehosi-hosi, nyumba okwa nyumba, omwa hithali, okwa syonzira, n’omwa syosinagogi. Babere balhamya omulema e Listra, abosi abalhangira ekithiko-thiko ekyo mubalengekania bathi ni syonyamuhanga neryo mubanza eribaramya. Aliwe Paulo na Barnaba mubabaghania n’eribugha bathi: ‘Muramaye Nyamuhanga musa! Thuli bandu ng’inywe.’ Neryo Abayuda balebe mubasa n’eribindulha emithima y’abandu bamahindukira Paulo n’erimughana. Abandu mubamuswirya omo mabwe, n’erimukura-kurira eyihya sy’omuyi, n’erimusighayo bathi abiriholha. Aliwe, Paulo abya iniakineho! Aho n’aho, balikyethu mubasyamuwathikya n’erimusubya omwa muyi. Enyuma waho, Paulo mwasuba e Antiokia.

Omo mwaka 49 E.K., Paulo mwaghenda omwa lhundi lhughendo lhw’eriyathulira. Abere abirilebya balikyabo abe Asia Enyike, mwayathulha engulhu yuwene omwa Yuropu. Mwaghenda e Atene, Efeso, Filipi, Tesalonika,  n’ehandi. Sila, Luka, n’omulhwana mulere iya Timoteo mubayiyunga oku Paulo omwa lhughendo lhwiwe. Mubawathikania eritsukisya ebithunga n’eribiwathikya eribya ibinaghumire. Paulo mwikalha e Korinto habw’omwaka mughuma n’embindi erighumya balikyethu ab’eyo. Mwathulira, mwakangirirya, n’erihandikira ebithunga bingyi b’esyobaruha. Kandi mwakolha n’omubiiri w’erilhuka esyohema. Endambi muyahika Paulo amasuba e Antiokia.

Enyuma waho, omo mwaka 52 E.K., Paulo mwaghenda omwa lhughendo lhwiwe olhwakasathu, mwatsuka omwa Asia Enyike. Mwahethukira e Filipi kandi mwandaghalira e Korinto. Paulo mwaghunza myaka mingyi e Efeso, akakangirirya, erilhamya, n’eriwathikya ekithunga. Kandi obuli kiro iniakalhabaya emikania omwa nyumba nene eye sukuru. Abandu bangyi mubahulikirira neryo mubahindulha emibere yabu. Erighunzerera, abere abirithulha engulhu yuwene omwa bihugho bingyi, Paulo mwaghenda e Yerusalemu.