Yehova mwalhaghanisya athi: ‘Sihendi syasabya eririra, obulhumi, obulhwere, kutse olhuholho. Ngendi syasangulha emisonia yosi okwa meso wabu. Ebindu bibi ebyosi bikendisya biriranwa.’

Yehova mwahira Adamu na Eva b’omwirima lye Edeni erikalhamu buholho kandi ibanatsemire. Babya b’eriramya Thatha wabu w’elhubulha n’eryusulya omwa kihugho mw’abaana babu. Adamu na Eva mubathowa Yehova, aliwe ekighendererwa kiwe mukithahinduka. Omwa kitabu kino thwabirilhangira ngoku obuli kindu ekya Nyamuhanga akalhaghanisaya kikabererera. Obwami bwiwe bukendisyaletha emighisa mibuyanga okwa kihugho, ngoku analhaghanisaya Abrahamu.

Sitani, esyombinga siwe, n’abandu babi abosi bakisiya ibahwaho. Obuli mundu akendi syaramya Yehova. Sithwendi syabya thukalhwalha kutse eriholha. Aliwe thukendi syabya thukabuka ithunawithe akaghalha kanene kandi ithunatsemire habw’eribyaho. Ekihugho kikendi syabya  paradiso. Obuli mundu akendi syabya n’ebyalya ebyuwene n’amanyumba awuwene. Abandu bakendi syabya b’olhukeri butsira abatsurumire kutse abatsindi. Ebisoro by’omoli sibyendi syathusagha kandi nethu sithwendisya bisagha.

Ka kikendi syatsemesya omughulhu Yehova akendi syatsuka erilhubukya abandu. Thukendi syathangirira abaholha kera nga Abeli, Noa, Abrahamu, Sara, Musa, Ruta, Esiteri, na Dawudi. Bakendi syasangira haghuma nethu erikolha Ekihugho mwa paradiso. Hakendi syabya bingyi eby’erikolha ebikatsemesaya.

Yehova anzire iwasyabyayo. Wukendi syamuminya omwa nzira eya wuthe wathalengekania. Ka thwongere eriyithunda hakuhi kandi hakuhi na Yehova, obuli kiro, lino n’erihika kera na kera!