Noa, n’eka yiwe, n’ebisoro mubingira omo bwathu. Yehova mwakinga olhuyi, neryo embulha yamatsuka eriwa. Muyawa kutsibu indi obwathu mubwatsuka erileretha okwa maghetse. Erighunzerera, ekihugho kyosi mukyosulha mw’amaghetse. Eyihya sy’obwathu, abandu abosi ababi mubaholha. Aliwe Noa n’eka yiwe babya ibane ndeke omwakathi. Bangabya imubatsema bungahi kundi mubowa Yehova?

Embulha muyawa habw’ebiro 40 omwa kiro n’omw’ithungyi, neryo muyaleka eriwa. Lyolho-lyolho amaghetse mwaghenda akakeha. Erighunzerera, obwathu mubwayitheka okwa bithwe. Aliwe yabya iyikine maghetse manene ehosi, neryo Noa n’ab’eka yiwe isibangalhua omo bwathu aho n’aho.

Omwa bolho-bolho, amaghetse muma. Ebiro ebyosi haghuma ebya Noa n’eka yiwe baghunza omo bwathu byabya bilhabire oko mwaka mughuma. Neryo Yehova mwababwira athi bahulhukire omwa kyabya nga ni kihugho kihya-kihya. Mubasima Yehova ya kutsibu busana n’eribalhamya, kandi mubakangya ekyo omw’ihongera Yehova.

Yehova mwatsemera ekihongwa ekyo. Mwalhaghanisya athi syendi syasathoghothya ekihugho ky’omwa maghetse. Ng’akaminyikalho k’omulhaghe oyo, mwaleka ekima ky’erimbere ikyakanda okwa lhubulha. Wune wathalhangira ekima?

Neryo Yehova mwabwira Noa n’ab’eka yiwe athi babuthe, basulhaye ekihugho.