Adamu na Eva babere babirilhua omw’irima lye Edeni, mubabutha abaana banene. Omwana wabu w’erimbere, ya Kaina, mwabya mulimi, n’owakabiri, ya Abeli, mwabya mulisya.

Kiro kighuma Kaina na Abeli mubahongera Yehova. Wunasi erihonga nga niki? Ky’ekihembo ekya wukaha Nyamuhanga. Yehova mwatsemera ekya Abeli, aliwe mwathatsemera ekya Kaina. Ekyo mukyaleka Kaina iniakwa ekinigha kinene. Yehova mwabwira Kaina athi ekinigha kiwe ekyo kyanganaleka iniakolha ekindu ekithuwene. Aliwe Kaina mwathahulikirira.

Ekya Kaina aby’akolire mwabwira Abeli athi: ‘Thughende omoli mwa haghuma.’ Babere ban’eyo ya bibene, Kaina mwaghulhukira oko mughalha wabu  n’erimwitha. Ni kyahi ekya Yehova angakolire busana n’eki? Mwasuyira Kaina omw’ireka aghenda haali kutsibu okw’eka yabu. Kaina abya isyanga thasyalighirwa erisuba ewabu.

Eki kikathweghesayaki? Ithwangana tsuka erikwa ekinigha ebindu byamathendibya ngoku thulhue thwanzire. Thwamayowa ithuli mwasa mw’ekinigha​—kutse bamathukunga bakalhangira ku thwabirikwa ekinigha​—ambi ithwakolha esyombinduka omwa byalhuba ekinigha ekyo kithe kyalhwiririramo ebindi.

Kundi Abeli aby’anzire Yehova kandi mwakolha ekihikire, Yehova syendi syamwibirirwa. Nyamuhanga akendi syabya akakolha ekihugho mwa paradiso, akendi syalhubukya Abeli.