Abrahamu mwakangirirya mughalha wiwe Isaka erianza Yehova n’eriyikethera emilhaghe ya Yehova eyosi. Aliwe Isaka abere ahikya myaka nga 25, Yehova mwabwira Abrahamu athi akole ekindu ekyabya kikalire erikolha. Ni kyahi?

Nyamuhanga mwabwira Abrahamu athi: ‘Wimaye mughalha wawu mughuma musa, wumuheyo ng’obuhere okwa kithwe ekiri omwa kihugho kye Moria.’ Abrahamu abya isyasi ekikaleka Yehova iniamubwira athi akole ekyo. Nomwabine, mwowa Yehova.

Omo ngyakya bukakya, Abrahamu mwathwalha Isaka n’abaghombe biwe babiri, bamalholha e Moria. Habere hakya biro bisathu ibanemughenda, mubalhangira ebithwe by’erya. Abrahamu mwabwira abaghombe biwe athi babalinde aho iyo na Isaka bakayaha obuhere. Abrahamu mwahekya Isaka y’esyongwe, na Abrahamu mwaheka omuhamba. Isaka mwabulya thatha wiwe athi: ‘Ekisoro ekya thukayahonga kiri hayi?’ Abrahamu mwasubirya athi: ‘Mughalha waghe, Yehova akendi thuhakyo.’

Neryo babere bahika okwa kithwe, mubahimba ekiherero. Neryo Abrahamu mwaboha ebyalha n’ebisandu bya Isaka, amamuhira okwa kiherero.

Abrahamu mwimya omuhamba. Okwa ndambi eyo, omumalaika wa Yehova mwabirikira erilhua elhubulha athi: ‘Abrahamu! Si wukole mughalha wawu y’ekindu! Lino namaminya ngoku wuwithe erikirirya omu Nyamuhanga kundi wulhue iwunanzire erihonga mughalha wawu.’  Neryo Abrahamu mwalhangira embangali iyinaghobenie amahembe wayu w’omwa kisaka. Neryo mwalhua iniaboholha Isaka, omo mwanya wiwe amakolesya embangali eyo ng’ekihongwa.

Eritsuka ekiro ekyo, Yehova mwahulha Abrahamu mwa munywani wiwe. Wunasi nga ni busana naki? Abrahamu mwakolha ekyosi-kyosi ekya Yehova aby’anzire iniakolha, nomwangabya isyabya asi ekikaleka Yehova iniamubwira athi akikole.

Yehova mwasuba omwa mulhaghe wiwe oku Abrahamu athi: ‘Nasyakutsumulha, kandi nasyakanyirirya abaana bawu.’ Eki kyamanyisaya kithi angatsumwire abandu abosi babuya erilhabira omw’ihiika lya Abrahamu.