Hakuhi n’etawuni eye Babeli habya eyindi tawuni eyikahulhawa mwa Uri, eyabya mw’abandu abakaramaya esyonyamuhanga nyingyi omwakanya ka Yehova. Aliwe e Uri eyo yabya omulhume oyuwabya akaramya Yehova musa. Erina liwe in’iyo Abrahamu.

Yehova mwabwira Abrahamu athi: ‘Wulhue ewenyu n’erisighania abahughu bawu, wughende omwa kihugho ekya ngendi kukangya.’ Neryo Nyamuhanga mwamulhaghanisya athi: ‘Wukendi syabya kihanda kinene, kandi ngendi syakolera abandu b’ebindu bingyi bibuya erilhabira omw’iwe.’

Abrahamu syabya asi aho Yehova akamuthuma, aliwe aby’ayikethere Yehova. Neryo Abrahamu, mukali wiwe Sara, thatha wiwe Tera, n’omwana wa mughalha wabu, ya Loti, mubaboha ebindu  byabu neryo busana n’obwowa bamatsuka olhughendo olhwabya lhuuli.

Abrahamu abya w’emyaka 75 omughulhu iyo n’ab’eka yiwe bahika omwa kihugho ekya Yehova aby’anzire ibalhangira. Kyabya kikahulhwamu ekihugho kye Kanana. Eyo, Nyamuhanga mwakania na Abrahamu n’erimulhagha athi: ‘Ekihugho kyosi ekya wamalhangira, nasyakiha abaana bawu.’ Aliwe Abrahamu na Sara babya ibamabirikulha kandi isibawithe omwana na mughuma. Neryo Yehova angaberererye athi omulhaghe wiwe oyu?