Enyuma w’erighunga ly’amaghetse, Noa n’abaghalha biwe mubabutha abaana banene. Mubakanya, bamatsuka eriyitsatsanga omwa bitsweka muthina-muthina eby’ekihugho, ngoku Yehova anabya iniabiribabwira.

Aliwe awandi maka mwathowa Yehova. Mubabugha bathi: ‘Muleke thuhimbe etawuni thwanabya omo.  Thukendi himba enyumba nyiri-nyiri nuku akasweswe kayu kahike elhubulha. Neryo thukendibya ithwamabiriyikolera erina.’

Yehova mwathatsemera ekya bandu abo bakolha, neryo mwathwamu eribimania. Wukalengekanaya mwakikolha athi? Kitsumbukirania, mwaleka babughe emibughe muthina-muthina. Kundi babya isibangathasya yitheghererania, mubaleka obuhimbe. Etawuni eya babya ibabirihimba eyo muyahulhwamu Babeli, ekikamanyisaya “Eritaburwa.” Abandu mubatsuka erihumayo, bamayitsatsanga omwa kihugho kyosi. Aliwe mubalholha embere erikolha ebindu bibi eya baghenda bakaya eyo. Ibbwa mbwino hanabya ababya ibakinanzire Yehova. Thukendi minya ekyo omwa sura eyikakwamako.