Yehova mwalhaghanisya Yakobo athi akendi syamutheya ngoku anatheghaya Abrahamu na Isaka. Yakobo mwikalha omwa kitsweka ekikahulhawamu Harani, eyo aherukiraya. Eka yiwe muyabya nene kandi amathunga bindu binene kutsibu.

Erighunzerera Yehova mwabwira Yakobo athi: ‘Wusube omwa kihugho ky’ewenyu.’ Neryo Yakobo n’eka yiwe mubatsuka olhughendo lhuuli olhw’erisubayo. Ibane mughenda, abaghombe ba Yakobo mubasa ey’ali n’eribugha bathi: ‘Mughalha wenyu Esau anemwasa, kandi ane n’abalhume 400!’ Yakobo mwasagha athi Esau akanza eribakolha nabi iyo n’eka yiwe. Mwasaba Yehova athi: ‘Nyilhamaye oko mughalha wethu.’ Ekiro ekyakwamako Yakobo mwathumira Esau y’ekihembo eky’esyombuli nyingyi, esyombene, esyonde, esyongamiya, n’esyopunda.

Omwa kiro Yakobo iniane iyuwene, mwalhangira omumalaika! Omumalaika mwatsuka erilhwa nayu. Mubanyukana obuthuku erikya. Nomwakine indi Yakobo mwahuthalha, mwathalhuhirira. Omumalaika mwabugha athi: ‘Leka ngaghende.’ Aliwe Yakobo mwabugha athi: ‘Sinendi kuleka wuthe wanzumulha.’

Erighunzerera omumalaika mwatsumulha Yakobo. Aho Yakobo mwaminya ngoku Yehova syendi lighira Esau erimukolha nabi.

Engyakya eyo, Yakobo mwalengya ameso amalhangira Esau n’abalhume 400. Yakobo mwanguha amabya embere sy’eka yiwe  n’eriyunamira mughalha wabu emirundi musanju. Esau mwanguha eyiri Yakobo, amayamuwako. Abahasa aba mubalira, bamahiraho obuholho. Wukalengekanaya Yehova mwayowa athi busana n’emibere eya Yakobo aghunzira mw’ekitsibu eki?

Enyuma waho Esau mwasuba ewiwe, na Yakobo amalholha embere n’olhughendo lhwiwe. Yakobo mwabutha baghalha 12. Ibakahulhawamu Rubeni, Simeoni, Lawi, Yuda, Dani, Nafutali, Gadi, Aseri, Isakari, Zebuloni, Yozefu, na Benyamini. Omughuma w’okw’ibo​—ya Yozefu​—mwakolesibwa na Yehova erilhamya abandu Biwe. Wunasi ngoku aby’akolire eki? Leka thulebaye.