Musa mwikalha e Midiani habw’emyaka 40. Mwathahya amabutha n’abaana. Kiro kighuma abere anemulisya esyombuli hakuhi n’Ekithwe Sinai, mwalhangira ekindu ekikaswekaya. Ekisaka kyabya kikaka kw’omuliro, aliwe isikirihya! Musa abere aseghera hakuhi erilebya ndeke, mwowa omulenge akalhua omwa kisaka ekyo athi: ‘Musa! Si wuseghere hakuhi. Lhusaya ebiryathu byawu kundi wimene aha buyirire.’ Yehova yuwabya iniakabugha erilhabira omwa mumalaika.

Musa mwakwa obuba, neryo mwaswika obusu bwiwe. Omulenge mwabugha athi: ‘Nabirilhangira eriaghalhwa ly’Abaisraeli. Ngendi balhamya okwa Banya Misiri n’eribaletha omwa kihugho ekyuwene. N’iwe wukendiyasondolha abandu baghe erilhua e Misiri.’ Wukalengekanaya ekyo mukyanaswekya Musa?

Musa mwasubirya athi: ‘Nasyabugha indiki abandu bakanyibulya nga nindi oyuwamanyithuma?’ Nyamuhanga mwasubirya athi: ‘Babwire wuthi Yehova, Nyamuhanga wa Abrahamu, Nyamuhanga wa Isaka, na Nyamuhanga wa Yakobo yuwamakuthuma.’ Neryo Musa mwasubirya athi: ‘Kandi ibbwa abandu bamaghana erinyihulikirira?’ Yehova mwaha Musa ekikamukanganaya ngoku akendi syamuwathikya. Mwabwira Musa athi aswiraye omwigho wiwe w’ahisi. Neryo omwigho oyu mwabya nzoka! Musa abere akahamba omukira w’enzoka eyo, yamathasyabya mwigho kandi. Yehova mwabugha athi: ‘Wukendi syabya wukakolha ekithiko-thiko eki, kikendi syakangania ku ningye nakuthuma.’

Musa mwabugha athi: ‘Singasi erikania ndeke.’ Yehova mwamulhaghanisya athi: ‘Ngendi syakubwira eby’eribugha, kandi ngendi thuma na mughalha wenyu Haruni eriyakuwathikya.’ Abere abiriminya ngoku Yehova ane haghuma nayu, Musa mwathwalha mukali wiwe n’abaghalha biwe, amasuba e Misiri.