Omwa kihugho kye Uzi, yabya yikere omulhume oyuwabya akaramya Yehova. Erina liwe iya Yobu. Aby’awithe ebindu bingyi n’eka nene. Inianzire abandu, kandi iniakawathikaya abanakwa, abakwakali, n’esyongubi. Neryo kundi Yobu mwakolha ebyuwene, mbwino kikamanyisaya kithi syangabwene ebitsibu?

Yobu abya isyasi, aliwe Sitani Diabolo abya inianamuthungerere. Yehova mwabwira Sitani athi: ‘Wunewalhangira omughombe waghe Yobu? Sihali oyuli ng’iyo okwa kihugho. Akanyowa kandi akakolha ebihikire.’ Sitani mwasubirya athi: ‘Ni kwenene Yobu akakowa. Wukamutheghaya n’erimutsumulha. Wabirimuha ekithaka n’ebisoro. Aliwe thamulhusya byoko ebyosi, nayu akendi leka erikuramya.’ Yehova mwabugha athi: ‘Wanganalenga oku Yobu. Aliwe isiwamwitha.’ Ni kyahi ekyaleka Yehova inialighira Sitani erilenga oku Yobu? Abya inianayikethere ngoku Yobu syendi lemwa.

Sitani mwatsuka erilenga oku Yobu omw’imuhikya kw’ebitsinduli bingyi. Erimbere mwathuma abandu abakahulhawamu Abaseba eriba esyonde n’esyopunda sya Yobu. Enyuma waho omuliro amahisya esyombuli sya Yobu esyosi. N’abandi bandu, Abakaldea, mubasa bamiba esyongamiya siwe. Abaghombe ababya bakatheya ebisoro biwe ebyo nabu mubithibwa. Muhasa ibbwa ekitsinduli ekikalire kutsibu. Abaana ba Yobu abosi mubaholha omughulhu enyumba eya babyamu ibane okw’irya yabathererako. Eki mukitha Yobu ya bulighe bunene, aliwe mwathaleka eriramya Yehova.

Sitani aby’anzire Yobu iniaghalhwa kwilhaba naho, neryo mwamuletha kw’ebimatha okwa mubiri  wiwe owosi. Yobu mwabya omwa bulhumi bunene. Abya isyasi ekikaleka ebindu byosi ebi ibyamuhikako. Nomwabine, Yobu mwathaleka eriramya Yehova. Nyamuhanga mwalhangira ebyosi ebi, kandi mwatsemera Yobu ya kutsibu.

Neryo Sitani mwathumira Yobu y’abalhume basathu erimulengako. Mubamubwira bathi: ‘Wutholere eribya iwabirikolha ebibi neryo wabirianza eribibisa. Nyamuhanga akakusuyira.’ Yobu mwabugha athi: ‘Sihali kibi ekyanakolire.’ Aliwe neryo mwatsuka erilengekania athi Yehova yukamulethera ebitsibu ebyo, neryo amatsuka eribugha athi Nyamuhanga syathamukangania obulingirirania.

Omulhwana oyukahulhawamu Elihu abya inianahulikirire bukuthu bakakania. Neryo nayu mwasalha abugha athi: ‘Inywe bosi ebya mukabugha biwire. Yehova alengire kutsibu obuyitheghererya bwethu. Syangakolha nahake ekindu kibi. Akalhangira obuli kindu kandi akawathikaya abandu omwa bitsibu byabu.’

Neryo Yehova mwakania na Yobu. Mwabugha athi: ‘Wabya hayi ingahangika olhubulha n’ekihugho? Ekikaleka iwabugha wuthi sindi w’obulingirirania niki? Wukakanaya, aliwe isiwasi ekikaleka ebindu ibyabya.’ Yobu mwaligha esobya yiwe neryo amabugha athi: ‘Nabya isingahikire. Nabirikowako, lero lino namakuminya ndeke. Sihali ekithe kyanga thokekana okw’iwe. Wunganyire busana n’ebya nabugha.’

Erilengwako lyabere lyahwa, Yehova mwalhamya Yobu, amamuha n’ebindu kwilhaba ebyabya nabyo erimbere. Yobu mwabyaho ahabw’omughulhu muuli, omwa ngebe eyitsemire. Yehova mwatsumulha Yobu busana n’erimwowa n’omughulhu kyabya kikalire. Wunemwendibya nga Yobu, erilholha embere eriramya Yehova haliki sihaliki?