Myezi ibiri Abaisraeli balisokire Engetse y’Engulha, mubahika okwa Kithwe Sinai. Eyo, Yehova mwakolha endaghane n’Abaisraeli eribya kihanda kiwe ky’embaghane. Mwabatheya n’eribaha obuli kindu ekya bakayithagha​—emana ey’erirya, esyongyimba esithekulha, n’omwanya owuwene ow’eribyamo. Wamabya iwuli mubuthi, wathikaya omwana wawu eriyitheghererya ekyaleka Yehova iniaha Abaisraeli b’Emighambo, ehema y’erihindaniramu, n’abahereri. Hira omuwathu okwa mughaso w’eriberererya ebya thukayilhagha, erisighalha ithunayikehirye, n’eribya bathaleghulha oku Yehova mughulhu wosi.