Abaisraeli babya ibamabirighunza hakuhi myaka 40 omo mbwarara. Babya ibamabirilhwa n’erikinda esyotawuni nyingyi. Lero lino, babere banapangira omw’irungu lya Moabu ebulhua-lyuba bw’Olhusi Yorodani, obuthuku bwabya ibwamahika ibo eryingira omwa kihugho ekya Lhaghanisibawa. Balaka, omwami we Moabu, mwakwa obuba athi bakendi basahulha ekihugho kyabu. Neryo mwabirikira omulhume oyukahulhawa mwa Balama eryasa e Moabu erisyatsuma kutse erithakira Abaisraeli.

Aliwe Yehova mwabwira Balama athi: ‘Isiwayathakira Abaisraeli.’ Neryo Balama mwaghana erighenda. Omwami Balaka mwathasyamubirikira omurundi wakabiri n’erimulhagha erimuha ekyosi-kyosi eky’anganza. Kandi, Balama mwaghana. Neryo Nyamuhanga mwabugha athi: ‘Wangana ghenda, aliwe ambi iwayabugha ebya ngakubwira indi wubughe.’

Balama mwasambira okwa punda yiwe amaghenda e Moabu. Mwanza eriyathakira Abaisraeli nomwakine indi Yehova abya iniabirimubwira athi isyakolha ekyo. Malaika wa Yehova mwamubuthukirako omo nzira emirundi isathu. Balama isyanga lhangira omumalaika, aliwe epunda ya Balama iyinamulhangire. Epunda muyakitha erilhua omo nzira, yamaya omwa kisuki. Enyuma waho muyaghenda ahali omukunguli yamahimathira ekisandu kya Balama ky’okw’igho. Erighunzerera epunda muyabundama ahisi omwa kathi-kathi k’enzira. Emirundi eyosi eyi, Balama iniakabya inianemuswirya epunda y’omwa mwigho.

Enyuma w’omurundi wakasathu, Yehova mwaleka epunda yibughe. Epunda muyabulya Balama: ‘Ni kyahi ekyalekire iwanzwirya?’ Balama mwabugha athi: ‘Wabirinyighaya! Ku nabya n’omuyali nanga kwithire.’ Epunda muyabugha yithi: ‘Wabirinyighenderako ahabw’emyaka mingyi. Ngane ngathakukolha nyithya erilhua kera?’

Neryo Yehova mwaleka Balama alhangire omumalaika. Omumalaika mwabugha athi: ‘Yehova mwakuthanga athi isiwayathakira Abaisraeli.’ Balama mwabugha athi: ‘Mungasobaya. Wuleke ngasube eka.’ Aliwe  omumalaika mwabugha athi: ‘Wangana ghenda e Moabu, aliwe ambi iwayabugha ekya Yehova akakubwira athi wubughe.’

Eki mukyan’eghesya Balama y’erisomo? Eyihi. Enyuma waho, Balama mwalengesya erithakira Abaisraeli mirundi isathu, aliwe obuli murundi ibbwa Yehova iniakabatsumulha. Erighunzerera, Abaisraeli mubaghothera Moabu, Balama am’ithibwa. Mbwino si kyangabere kibuya Balama erihulikirira Yehova okw’inatsuka?