Habere halhaba buthuku, Abaisraeli ibane omo mbwarara, Kora, Datani, Abiramu, n’abandi 250 mubayisamambulha oku Musa. Mubabugha bathi bamamulhuha, bathi: ‘Busana naki iwe iwabya musondoli wethu na Haruni iniabya muhereri mukulhu? Yehova ane nethu ithwe bosi, butsira iwe na Haruni basa.’ Yehova mwathatsema. Mwalhangira in’iyo bakayisamambulhako!

Musa mwabwira Kora n’abakamusighika athi: ‘Omo ngyakya mwase oko hema, imune n’esyoruhu [ebibindi by’omuliro] syenyu imunaswire obukwa. Yehova akendi kangania oyo abirisombolha.’

Engyakya, Kora n’abandu biwe 250 mubayabanangana na Musa eyiri ehema eyibuyirire. Mubahisya obukwa nga ni bahereri. Yehova mwabwira Musa na Haruni athi: ‘Muyighabule oku Kora n’abandu biwe.’

Nomwakine indi Kora abya iniabirighenda eyiri Musa okwa hema eyibuyirire, Datani, Abiramu, n’ab’omwa maka wabu mubaghana erighendayo. Yehova abya iniabiribwira Abaisraeli athi balhue ahali esyohema sya Kora, Datani, na Abiramu.  Neryo-neryo, Abaisraeli mubakolha ekyo. Datani na Abiramu, n’ab’omwa maka wabu mubimana eyihya w’esyohema syabu. Kitsumbukirania, ekithaka mukyasathika n’eribamera! Eyiri ehema eyibuyirire, omuliro mwalhua elhubulha, amathimya Kora n’abandu biwe 250.

Neryo Yehova mwabwira Musa athi: ‘Wimaye kubo kw’emyutso, erilhusyagho okwa musondoli w’obuli kihanda. Aliwe okwa mutso w’ekihanda kya Lawi, wuhandike kw’erina lya Haruni. Wubikebyo omo Hema, neryo omutso w’omulhume oyo ngendi sombolha asyalhasa kw’ebimole.’

Ekindi kiro, Musa mwahulhukya emyutso eyosi, amakanganiayo abasondoli. Omutso wa Haruni abya iniabirihuta kw’ebimole, n’eryasa kw’ebighuma by’amalozi eby’erire. Omo nzira eyi, Yehova mwakangania ngoku abirisombolha Haruni eribya muhereri mukulhu.