Yehova mwabwira Musa athi: ‘Wase wunyeghaye eno okwa kithwe. Ngendi handika ebihano byaghe okwa bisayi by’amabwe n’erikuhabyo.’ Musa mwahethukira okwa kithwe neryo amabyaho emisibo n’ebiro 40. Abere an’eyo, Yehova mwahandika Ebihano Ikumi okwa bisayi bibiri by’amabwe neryo amabiha Musa.

Habere halhaba buthuku, Abaisraeli mubalengekania bathi Musa abiribasighania. Mubabwira Haruni bathi: ‘Thukanza omundu oyukendi thusondolha. Thukolere enyamuhanga!’ Haruni mwabugha athi: ‘Mumbe ehoro yenyu.’ Mwayeya ehoro eyo, amakolha mw’esanamu ey’ekyana ky’ende. Abandu mubabugha bathi: ‘Ekyana ky’ende eki ni Nyamuhanga wethu oyuwathulhusaya e Misiri!’ Mubatsuka eriramya ekyana ky’ende eky’ehoro, bamakolha n’obugheni. Ekyo kyanabya kibi? Ee, kundi abandu babya ibabiriyilhagha bathi bakendi syaramya Yehova musa. Neryo aho babya ibali okw’ithwa eriyilhagha lyabu eryo.

 Yehova mwalhangira ebya bakakolha ebyo, neryo mwabwira Musa athi: ‘Kima, wughende eyiri abandu. Babirighana erinyisikya kandi banemuramya enyamuhanga y’amabehi.’ Musa mwakima okwa kithwe, inianahekire ebisayi bibiri by’amabwe.

Abere akahika hakuhi n’ekilhaliriro kyabu, Musa mwowa abandu ibanemwimba. Neryo kandi amalhangira ibanemuhotholha n’eryunamira ekyana ky’ende. Musa mwahithana kutsibu. Mwaghusa ebisayi bibiri by’ahisi, neryo byamathulhangika. Neryo mwalhuaho iniathulhanga esanamu eyo. Neryo mwabulya Haruni athi: ‘Abandu mubakaleka bathi iwaligha erikolha ekibi kingaha n’eki?’ Haruni mwasubirya athi: ‘Siwuhithane. Siwunasi abandu aba kubali. Mubakananza enyamuhanga, neryo munganahira ehoro yabu y’omwa muliro neryo mwamalhua ekyana ky’ende eki!’ Haruni sy’abya atholere akakolha ekindu ng’ekyo. Musa mwasuba okwa kithwe, amayalemba-lemba Yehova erighanyira abandu aba.

Yehova mwaghanyira ababya banzire erimwowa. Wanamalhangira ngoku kyabya kikulhu Abaisraeli erikwama obusondoli bwa Musa?