Yosua mwaholha iniawithe emyaka 110, iniamabirisondolha abandu ba Yehova habw’emyaka mingyi. Omughulhu abya iniakineho, Abaisraeli babya ibane muramya Yehova. Aliwe Yosua abere abiriholha, mubatsuka eriramya esyosanamu ng’Abanya Kanana. Kundi Abaisraeli mubathalholha embere erikwama Yehova, mwalighira omwami we Kanana iya Yabini eribanubya. Abandu mubasaba Yehova y’obuwathikya. Neryo Yehova mwahabo omusondoli muhyaka iya Baraka. Angawathikirye abandu erisuba oku Yehova.

Debora, omuminyereri w’obukali mwathumira oku Baraka. Abya amuwithire omwatsi ono erilhua oku Yehova: ‘Wimaye abalhume 10,000, wusangane n’abasirikali ba Yabini oko lhusi lhwe Kisoni. Aho wukendi kinda Sisera omukulhu w’abasirikali ba Yabini.’ Baraka mwabwira Debora athi: ‘Ngendi ghenda, iwunalyaghenda naghe.’ Debora mwabugha athi: ‘Ngendi ghenda nawu. Aliwe wukiminye ngoku siwe wukend’itha Sisera. Yehova abiribugha athi omukali yukendi mw’itha.’

Debora mwaghenda na Baraka n’abasirikali biwe okwa Kithwe Tabori  eriyatheghekania amalhwa. Sisera abere akanowa omwatsi oyu, mwahindania esyogali siwe sy’amalhwa omwa musya w’ekithwe ekyo. Debora mwabwira Baraka athi: ‘Munabwire ni kiro ekya Yehova akendi kuha erisingura.’ Baraka n’abalhume biwe 10,000 mubandaghalha eriyasanga-sangana n’abasirikali ba Sisera abakalire.

Neryo Yehova mwaleka olhusi lhwe Kisoni ilhusulha n’eribogha. Esyoggali sya Sisera esy’amalhwa musyahathira omwa byondo. Sisera mwasigha eggali yiwe amathibitha. Baraka n’abasirikali biwe mubakinda abasirikali ba Sisera, aliwe Sisera iyo mwathibitha! Mwathibitha amayabisama omwa hema y’omukali oyukahulhawa mwa Yaeli. Yaeli mwamuha amathe neryo amamuswika ebbulangiti. Kundi abya alhuhire mwaghotsera. Neryo Yaeli mwasoba n’eritimba engyingyi y’omwa muthwe wa Sisera. Mwaholha.

Baraka mwasa akasondya Sisera. Yaeli mwahulhuka omwa hema yiwe n’eribugha athi: ‘Asa wingiremu. Ngendi kukangya omulhume oyo wukasondaya.’ Baraka mwingiramu amalhangira Sisera iniabiriholha. Baraka na Debora mubapipa Yehova omwa lhwimbo busana n’eriwathikya Abaisraeli erikinda esyonzighu syabu. Omwa myaka 40 eyakwamako, Abaisraeli mubabya omwa buholho.