Eli, Omuhereri Mukulhu aby’awithe baghalha biwe babiri ababya bakakolha ng’abahereri eyiri ehema. Habya Hofuni na Finehasi. Mubathowa ebihano bya Yehova kandi ibakakolha abandu ba nabi. Abaisraeli ibakabya bakalethera Yehova y’obuhere, Hofuni na Finehasi ibakatsuka eriyisombolera mw’amaghabu awuwene kutsibu. Eli mwaminya ebya baghalha biwe bakakolha, aliwe mwathayira eky’akakolha. Mbwino Yehova angana lighire eki erilholha embere?

Nomwakine indi Samweli abya mulere kutsibu oku Hofuni na Finehasi, mwathabagherererya. Yehova mwasima Samweli. Kiro kighuma, Samweli inianaghotsere, mwowa omundu akabirikira erina liwe. Samweli mwahangana n’erithibitha eyiri Eli n’eribugha athi: ‘Ingye yono!’ Aliwe Eli mwabugha athi: ‘Singathakubirikira. Suba omwa ngyingo.’ Samweli mwasuba omwa ngyingo. Kandi amathasyowa omulenge. Samweli abere akowa omulenge omurundi w’akasathu, Eli mwaminya ngoku Yehova yukabirikira Samweli. Eli mwabwira Samweli athi, amathasyowa omulenge abughe athi: ‘Yehova, bugha. Omughombe wawu anahulikirire.’

Samweli mwasuba omwa ngyingo. Neryo kandi mwowa omulenge athi: ‘Samweli! Samweli!’ Mwasubirya athi: ‘Bugha, omughombe wawu  anahulikirire.’ Yehova mwabugha nayu athi: ‘Wubwire Eli wuthi ngayamusuyira n’ab’eka yiwe. Anasi ebibi ebya baghalha biwe bakakolha omwa hema yaghe, aliwe syali yira eky’akakolha.’ Engyakya, Samweli mwakyungulha esyonyuyi sy’ehema ngoku akanakolha. Mwasagha eribwira omuhereri mukulhu ebya Yehova alyabugha. Aliwe Eli mwamubirikira n’erimubulya athi: ‘Samweli, Yehova mwakakubwira athiki? Mbwire ebyosi.’ Neryo Samweli mwabwira Eli y’ebyosi.

Samweli abere anemukulha, Yehova mwalholha embere erimusondolha. Omwa kihugho kyosi, Abaisraeli bosi mubaminya ngoku Yehova abirisombolha Samweli eribya muminyereri kandi mutsweri.