Omuisraeli oyukahulhawa mwa Elkana aby’awithe abakali babiri, ya Hana na Penina, aliwe aby’anzire Hana ya kutsibu. Obuli ndambi Penina iniakasekereraya Hana kundi Hana syabya awithe abaana aliwe Penina iniawithe abaana banene. Obuli mwaka, Elkana iniakathwalha eka yiwe eyiri ehema e Silo bakayaramya. Kiro kighuma ibane eyiri ehema, Elkana mwalhangira omwanze wiwe ya Hana iniali omwa bulighe bunene. Neryo mwabugha athi: ‘Hana, leka eririra, ngane nawu. Ngakwanzire.’

Enyuma waho, Hana mwayasaba iyuwene. Isyanga thoka erileka eririra akasaba Yehova y’obuwathikya. Mwalhaghanisya Yehova athi: ‘Yehova wamanyiha omwana w’obulhume, iningendi syakuhayo, kandi iniakendi syakukolera omwa ngebe yiwe yosi.’

Eli, Omuhereri Mukulhu, mwalhangira Hana inianemusekemuka neryo amalengekania athi athamire. Hana mwamubwira athi: ‘Eyihi, Mukama waghe, singathamire. Ngawithe ekitsibu ekikalire, kandi nganemukibwira Yehova.’ Eli mwaminya ngoku amasobya neryo mwamubwira athi; ‘Nyamuhanga akuhe ekya  wukayithagha.’ Hana mwayowa buholho neryo amayighendera. Enyuma waho, Hana mwabutha omwana n’erimwahulha mwa Samweli. Wukalengekanaya Hana mwatsema bungahi?

Hana mwath’ibirirwa omulhaghe wiwe oku Yehova. Mwabya akana mutsirisya amabere, mwamuletha eyiri ehema erisyakolerayo. Hana mwabwira Eli athi: ‘Oyu y’omwana oyo nabya ingasaba. Namamuha Yehova erimukolera omwa ngebe yiwe yosi.’ Obuli mwaka Elkana na Hana ibakayalebaya Samweli n’erimuthwalira akakanzu akahyaka. Yehova mwathasyaha Hana y’abandi baghalha basathu n’abali babiri.