Mughalha w’Omwami Saulo omukulhu ya Yonatana, abya mulhwi muthubaha. Dawudi mwabwira Yonatana athi wanguhire kutsibu kwilhaba erisamba kandi wukalire kwilhaba endale. Kiro kighuma Yonatana mwalhangira abasirikali balebe Abafilisitini okwa kathwe. Mwabwira oyuwabya akamuhekera ebindu biwe ebya malhwa athi: ‘Thukendi bahamba Yehova inianalyathuha ekiminyikalho. Abafilisitini bamathubwira bathi mwase, neryo ithwaminya ku thwanga bahamba.’ Abafilisitini mubabirikira bathi: ‘Mwase thwanalhwa!’ Neryo Yonatana n’oyukamuhekera ebindu biwe mubahethukira okwa kathwe n’erikinda abasirikali b’Abafilisitini 20.

Kundi Yonatana yuwabya mwana w’erimbere wa Saulo, yuwabya atholere erisyasuba okwa kithumbi ng’omwami. Aliwe Yonatana mwaminya ngoku Yehova abirisombolha Dawudi eribya mwami we Israeli; kandi nibya, abya  isyahithene. Yonatana na Dawudi mubabya banywani kutsibu. Mubalhaghana eritheghangania n’erilhwiranako. Yonatana mwaha Dawudi y’ekanzu yiwe, omuyali, engabo, n’omukabba wiwe erikangania ku ni munywani wiwe.

Omughulhu Dawudi abya akabisama Saulo, Yonatana mwaghenda eyali n’erimubwira athi: ‘Wubye n’amaaka n’obuthubaha. Yehova abirikusombolha eribya mwami. Nibya na thatha waghe anasi ekyo.’ Wunanzire eribya n’omunywani mubuya nga Yonatana?

Mughulhu mungyi, Yonatana iniakatsama engebe yiwe busana n’eriwathikya munywani wiwe. Yonatana mwaminya ngoku omwami Saulo mwanza eritha Dawudi, neryo Yonatana mwabwira thatha wiwe athi: ‘Ikikendibya kibi iwe eritha Dawudi; syawithe kibi eky’abirikolha.’ Saulo mwahithana okwa Yonatana. Habere halhaba myaka mirebe, Saulo na Yonatana mubaholera haghuma omwa lhuhi.

Yonatana abere abiriholha, Dawudi mwasondya mughalha wa Yonatana ya Mefiboseti. Omughulhu Dawudi abana Mefiboseti, mwamubwira athi: ‘Kundi thatha wawu abya munywani waghe mubuya, ngendisyakutheya omwa ngebe yawu yosi. Wukend’ikalha omwa kikali kyaghe n’erilira okwa meza yaghe.’ Dawudi mwath’ibirirwa munywani wiwe Yonatana.