Yosafati, omwami we Yuda, mwasambangulha ebiherero bya Baali n’esyosanamu omwa kihugho ekyo. Abya anzire abandu ibaminya ebihano bya Yehova. Neryo mwathuma abanya-mwami n’Abalawi e Yuda eriyakangirirya abandu ebihano bya Yehova.

Ebihanda ebyabya hakuhi ne Yuda mubya sagha eriyabambira e Yuda kundi byabya ibinasi ngoku Yehova ane haghuma n’abandu biwe. Nibya mubalethera n’Omwami Yosafati y’ebihembo. Aliwe Abamoabu n’Abaamoni, n’ab’omwa kihugho kye Seiri mubasyalhwa ne Yuda. Yosafati mwaminya ngoku akayithagha obuwathikya bwa Yehova. Neryo mwahindania abalhume, abakali, n’abaana e Yerusalemu. Iniane embere syabu mwasaba athi: ‘Ahathe iwe, sithwanga singura. Kisi thubwire eky’erikolha.’

Yehova mwasubirya omusabe athi: ‘Siwubahe. Ngendi kuwathikya. Musike, muhangane, mulhangire ngoku ngendi balhamya.’ Yehova mwabalhamya athi?

Engyakya eyakwamako, Yosafati mwasombolha abimbi n’eribabwira athi babye embere sy’abasirikali. Mubahulhuka omwa Yerusalemu eriya eyikayabya amalhwa omwa kitsweka ekikahulhawa mwa Tekoa.

Abimbi babere banemupipa Yehova n’obutseme omwa mulenge munene, Yehova mwalhwira abandu biwe. Yehova mwatabura Abaamoni n’Abamoabu bamatsuka er’ithana, kandi muhathasabuka na mughuma. Aliwe, Yehova mwatheya abandu be Yuda, abasirikali, n’abahereri. Abandu abosi ab’omwa bihugho ebihererenie ne Yuda mubowa ekya Yehova abirikolha, neryo mubaminya ngoku Yehova akinalhwira abandu biwe. Yehova akalhamaya athi abandu biwe? Omwa nzira nyingyi. Syaliyithagha buwathikya bwa mundu.