E Suria yabya akasika Akaisraeli akabya haali okwa b’ewabu. Kabya ikabirihekwa n’abasirikali be Suria, neryo mukabya kakobe k’omukali w’omukulhu w’amahe oyukahulhawa mwa Namani. Akasika kalere ako kabya kakaramya Yehova nomwakine indi ababya bikere nako sibabya bakamuramya.

Namani abya alhwere obulhwere obukalire neryo obuli ndambi iniakabya iniane omwa bulhumi. Akasika mukanza erimuwathikya. Mukabwira mukali wa Namani kathi: ‘Nganasi oyuwanga lhamya mwira wawu. E Israeli, yine omuminyereri wa Yehova oyukahulhawa mwa Elisa. Angana lhamya mwira wawu.’

Omukali wa Namani mwamubwira ebya kasika kalere kalyabugha. Namani abya inianayitheghekire erikolha ekyosi-kyosi anamathalhama, neryo mwaghenda omwa nyumba ya Elisa e Israeli. Namani mwalengekania athi Elisa akendi muthangirira ng’omundu w’ekitsumbi. Aliwe omwakanya k’erikania nayu iyuwene-wene, Elisa mwathuma omughombe wiwe  eriyakania na Namani n’erimubwira eky’erikolha athi: ‘Wughende wuyanabire omwa Lhusi Yorodani mirundi musanju. Neryo wukendi lhama.’

Namani mwahithana kutsibu. N’eribugha athi: ‘Indwe ngasi indi omuminyereri oyu akendi nyilhamya omw’isaba oku Nyamuhanga wiwe n’erinyilhamya omw’inyihira kw’ebyalha biwe lisa. Aliwe, akambwira athi ngaghende omwa lhusi olhu e Israeli. Thunawithe esyonyusi esyuwene e Suria. Busana naki ingathakwama kyaghendayo? Namani mwahithana, neryo mwalhua omwa nyumba ya Elisa.

Abaghombe ba Namani mubamuwathikya eribya n’amalengekania awuwene. Mubamubwira bathi: ‘Mbwino siwangakolire ekyosi-kyosi wanamathalhama? Ekya muminyereri oyu akakubwira erikolha kyolhobire. Busana naki iwuthakwama kyakikolha?’ Namani mwabahulikirira. Mwaghenda omwa Lhusi Yorodani n’eriyighusa omwa maghetse mirundi musanju. Omurundi w’omusanju, Namani mwalhua omwa maghetse iniamabirilhama ndeke. Mwatsema neryo mwaghenda eyiri Elisa eriyamusingya. Namani mwabugha athi: ‘Lino namabiriminya ngoku Yehova ya Nyamuhanga w’okwenene.’ Wukalengekanaya akasika Akaisraeli mukayowa kathi Namani akasuba eka iniabirilhama?