Omwami we Suria iya Beni-hadadi, aby’akabera eribambira e Israeli. Aliwe omuminyereri Elisa iniakasangwa abwira omwami we Israeli, neryo omwami iniabalha. Neryo Beni-hadadi mwathwamu eriheka Elisa. Beni-hadadi mwaminya ngoku Elisa ane omwa muyi we Dotani, neryo mwathumayo abasirikali be Suria eriyamuhamba.

Abasuria mubasa e Dotani omwa kiro. Engyakya, omughombe wa Elisa mwahulhukira eyihya amalhangira abasirikali bangyi ibanathimbire okwa muyi. Mwakwa buba n’erilhaka athi: ‘Elisa, thukoleki?’ Elisa mwamubwira athi: ‘Abali haghuma nethu ni bangyi kwilhaba abali haghuma nabo.’ Okwa ndambi eyo, Yehova mwawathikya omughombe wa Elisa erilhangira ngoku ebithwe ebyosi ebithimbire okwa muyi byoswire kw’esyopunda n’ebiggali by’amalhwa ebiri kw’omuliro.

Abasirikali be Suria babere bakanza erihamba Elisa, mwasaba athi: ‘Yehova, kisi wubakole mwa ndimathime.’ Aho n’aho, nomwakine  indi babya ibanalhangire, abasirikali mubathaminya aho bali. Elisa mwabwira abasirikali abo athi: ‘Mwabirithalha. Munyikwame, ngendibahikya oko mulhume oyo mukasondaya.’ Mubamukwama erihika e Samaria, eyo omwami we Israeli abya.

Abasuria mubaminyira matsule aho bali. Omwami we Israeli mwabulya Elisa athi: ‘Nyithebo?’ Mbwino Elisa mwana kolesya akaghisa aka erithuhulya abandu ababya bakalengaho erimukolha nabi? Eyihi. Elisa mwabugha athi: ‘Isiwithabo. Bahe ebyalya baghende nzira syabu.’ Neryo omwami mwabaha ebyalya binene n’eribugha athi basube ewabu.