Yosia aby’awithe myaka munani akabya mwami we Yuda. Omwa biro ebyo, abandu ibakakolha eby’olhuthahwa-thahwa n’eriramya esyosanamu. Yosia abere akahikya myaka 16, mwigha eriramya Yehova omwa nzira eyihikire. Abere akahikya myaka 20, mwatsuka erithulhanga esyosanamu n’ebiherero omwa Yuda yosi. Abere akahikya myaka 26, mwahira h’endegheka ey’erithasyuwania ehekalu ya Yehova.

Omwa hekalu, omuhereri mukulhu iya Hilikia, mwabana mw’omukunzo w’Emighambo ya Yehova​—obundi owahandikawa na Musa. Omuhandiki w’omwami iya Safani mwalethera Yosia y’omukunzo n’eritsuka erisoma Emighambo eyo omwa mulenge muuli. Yosia abere anemuhulikirira, mwaminya ngoku abandu balhue isibakyowa Yehova ahabw’emyaka mingyi. Omwami Yosia mwabugha na Hilikia athi: ‘Yehova abirithuhithanako kutsibu. Ghenda wukanaye nayu. Yehova akendi thubwira eky’erikolha.’ Yehova mwasubirya erilhabira omwa muminyereri w’obukali ya Hulda athi: ‘Abandu be Yuda babirinyisighania. Bakendi suyirwa aliwe butsira omwa mughulhu Yosia iniane mwami, kundi iyo abiriyikehya.’

Omwami Yosia abere akowa omwatsi oyo, mwaghenda omwa hekalu mwahindania abandu be Yuda haghuma. Neryo mwasomera ekihanda kyosi ky’Emighambo ya Yehova omwa mulenge muuli. Yosia n’abandu  mubayilhagha eriowa Yehova n’emithima yabu yosi.

Ekihanda kye Yuda kyabya ikyamabirighunza myaka mingyi isikiribuka Ekiro Kikulhu ky’Erikyuruka. Aliwe Yosia abere akasoma omwa Mighambo athi ekiro eki kitholere ikyibukwa obuli mwaka, mwabwira ekihanda athi: ‘Thukendi theya Ekiro Kikulhu ky’Erikyuruka oku Yehova.’ Neryo Yosia mwathegheka obuhere bungyi n’abimbi okwa hekalu. Neryo ekihanda mukyakolha Erikyuruka, bamakwamyako n’Ekiro Kikulhu ky’Amandu Awathe mwa Kihamya ahabw’ebiro musanju. Habya isihali hakathabya Erikyuruka eriri ng’eri eritsuka omwa biro bya Samweli. Kwenene Yosia abya anzire Emighambo ya Nyamuhanga. Wukanatsemera erigha oku Yehova?