Omwa muyi we Ninawe e Asuria, abandu babya babi kutsibu. Yehova mwabwira omuminyereri Yona athi aghende e Ninawe eriyabakunga athi babindule emibere yabu. Aliwe Yona mwathibitha omwa sindi nzira. Mwasamba obwathu amaya e Tarsisi.

Obwathu bwabere bune okwa ngetse, ekiyagha kinene mukyahitha, n’ababya omwa bwathu mubakwa obuba. Mubasaba oku syonyamuhanga syabu n’eribugha bathi: ‘Busana naki eki ikyabya?’ Erighunzerera, Yona mwababwira athi: ‘Munyitswebe. Ngatswa okwa bya Yehova anyibwire athi ngakole. Munyighuse omwa ngetse, n’ekiyagha kikendi leka.’ Ababya omo bwathu mubathanza erighusa Yona y’omwa ngetse, aliwe mwabahathikana. Babere bakamughusa omwa ngetse, ekiyagha mukyaleka.

Yona mwalengekania athi akayaholha. Abere anemudikira ekabuno omwa ngetse, mwasaba Yehova. Neryo Yehova mwathuma eyiswe nene. Muyamera Yona, aliwe muyithamwitha. Yona iniane omwanda y’eyiswe, mwasaba athi: ‘Ngakulhaghanisaya erikowa mughulhu wosi.’ Yehova mwatheya Yona omwanda y’eyiswe habw’ebiro bisathu neryo muyamusalira okwa musike okwa kithaka ekyumire.

Kundi Yehova mwalhamya Yona, mbwino eki mukyanamanyisya kithi Yona syendi thasyaghenda e Ninawe? Eyihi. Yehova kandi mwabwira Yona athi aghende e Ninawe. Lero lino, Yona mwaligha.  Mwayayo n’eribwira abandu babi abo athi: ‘Omwa biro 40, e Ninawe yikendi thoghothibwa.’ Neryo ekindu eky’athabya ayitsulirye mukyabya​—Abanya Ninawe mubowa n’erihindulha embere yabu. Omwami we Ninawe mwabwira abandu biwe athi: ‘Mubirikire oku Nyamuhanga mwanayisubamu. Obundi syendi thuthoghothya.’ Yehova abere alhangira eriyisubamu ly’abandu, mwathathoghothya e Ninawe.

Yona mwahithana kundi omuyi syathathoghothibwa. Thalengekania: Yehova mwaghumisirizya n’erikangania Yona y’olhukeri, aliwe Yona iyo mwathakangania olhukeri okwa bandu be Ninawe. Aliwe mwaghenda eyihya w’omuyi amayikalha omwa kitsutsu omw’isi sy’ekithina ky’olhungu. Neryo olhungu mulhuma, kandi Yona mwahithana. Neryo Yehova mwamubwira athi: ‘Wukatsomana ekithina ky’olhungu olhu kwilhaba abandu be Ninawe. Munakanganiryebo olhukeri, neryo bamalhamibwa.’ Enzumwa yabya iy’eyahi? Abandu be Ninawe babya b’omughaso munene kwilhaba ekirimwa kyosi-kyosi.