Balikyethu Banzwa:

Ithwe ng’abaramya ba Yehova, thwanzire Ekinywe kiwe, e Biblia. Thukaligha ndeke-ndeke ngoku omwatsi wakera owalimu ahikire, erithusondolha ndeke omwa ngebe, n’erikangania ndeke-ndeke olhwanzo olhwa Yehova awithire abandu. (Esyonyimbo 119:105; Luka 1:3; 1 Yoane 4:19) Thwanzire kutsibu eriwathikya abandi erigha ekwenene y’obughuli eyiri omwa Kinywe kya Nyamuhanga. Busana n’ekyo, thuli n’obutseme bunene erihulhukya ekitabu kino, Amasomo Agho Wang’igha Okwa by’Omwa Biblia. Muleke thuthababwira bike okwa kitabu eki.

Omwatsi munene omwa kitabu kino atheghekirwe busana n’abaana. Aliriryo, nagho angana kolesibwa eriwathikya abakulire abanzire eriminya bingyi omwa Biblia. Neryo kundi e Biblia ni kitabu ky’obuli mundu, ahathe erithika-thika ithwe bosi thukendi ghasirwa omw’ilhaba omwa masomo aya awanga thuwathikya eribya n’etseme ey’ekwenene.

Omw’ikolesya emyatsi eyiri omwa Biblia, ekitabu kino kikathubwira ebihambire okw’ibyaho ly’abandu eritsuka okw’ihangika. Akaghalha kabirihirwaho erilhangira indi emyatsi ye Biblia eyi yikahebawa omwa nzira eyolhobire eriyitheghererya, kandi n’erilengaho kutsibu erithondayo erikwamana ngoku yabya yikabya.

Aliriryo, ekitabu kino sikirikwama kya subulira okw’ikania buyira okwa myatsi ye Biblia. Emyatsi eyirimu n’ebisasani bitheghekirwe omwa nzira eyikaleka iwalhangira ebiri omwa Biblia ebi ibyabya nga binemubya kandi iwalhangira eriyowa ly’abakakanibawako.

Ekitabu kino kikathuwathikaya erilhangira ngoku e Biblia ni kitabu ekihambire okwa bandu abowa Yehova n’abaghana erimwowa. Kandi kikaleka ithwabana amasomo awathukab’ighirako. (Abanya Roma 15:4; 1 Abanya Korinto 10:6) Ekitabu eki kighabirwe mw’ebitsweka 14.  Okw’itsuka ly’obuli kitsweka w’omwatsi owakakanganaya esyonzumwa ngulhu-ngulhu esya thwangan’igha.

Wamabya iwuli mubuthi, iwanganasoma erisomo n’omwana wawu neryo imwakania okwa kisasani ekirihambireko. Neryo inywe bosi babiri imwangana soma amasako we Biblia agho erisomo eryo liseghemereko. Wathikaya omwana erilhangira ngoku ebyosi eby’akasoma omw’isomo biseghemere okwa Biblia. Enzira eyi y’eyangana kolesibwa wukawathikya omundu oyukulire erithunga ekitsutsu ky’omwatsi owali omwa Biblia.

Thuli n’amaha thuthi ekitabu kino kikendi wathikya ab’omuthima mwolho abosi​—abalere n’abakulhu​—eriminya ebiri omwa Kinywe kya Nyamuhanga n’erighendera okwa masomo awalimu omwa ngebe yabu. Eki kikendi leka nabu ibaramya Yehova ng’ab’okw’ihiika liwe eryanzibirwe.