1, 2. (a) Iwe ahabwawu, ekihembo kikakuyirira omubongo ­munene mughulhu wahi? (b) Busana naki kyangana buwa indi embanulho kya kihembo ky’omubongo munene ekya wanga-bana?

NI KIHEMBO ki kibuyanga eky’awabiri thabana? Ekihembo sikiri yithaghisaya eribya ky’obughuli bunene imukyabya ky’omubongo. Omwa kwenene, omubongo w’ekihembo sialighanzawa omwa syombulho esikakighulha. Aliriryo, omughulhu ekihembo kika kulethera etseme kutse kikaberereraya ekiyithawa omwa ngebe, kikabya ikikuwithire omubongo munene.

² Okwa bihembo bingi ebya wanga lengekania eribana, hali kighuma ekilengire ebindi ebyosi. Ky’ekihembo kya Nyamuhanga eyiri abandu. Yehova abirithuha bindu bingi, aliriryo ekihembo kiwe kikulhu eky’athuha, y’embanulho ey’ekihongo kya Mughalha wiwe, Yesu Kristo. (Matayo 20:28) Ngokwa thukendi lhangira omwa sura eno, embanulho kye ekihembo ky’omubongo munene ekya wangabana, kundi kyangana kulethera etseme nyingi kandi kyangana berererya ebiyithawa byawu eby’omubongo. Embanulho kwenene, ni kikorwa kikulhu kya Yehova erikangania olhwanzo lhwiwe eyawuli.

3. Embanulho niki, kandi ekya thutholere ithwa tsuka eriyitheghererya imuthwa minya ndeke ekihembo ky’omubongo eki niki?

³ Omwa bikuhi, embanulho y’enzira ya Yehova ey’erisabuliramu, kutse erilhamirya mw’abandu okwa kibi n’olhuholho. (Abanya Efeso 1:7) Eriyitheghererya amakuru w’engangirirya ye Biblia eyi, thutholere ithwa lengekania okwa kyabya kyabere omw’irima ly’Edeni. Thwamabiri yitheghererya ekya Adamu aheraya omughulhu ahalhaya, imuthukendi minya ndeke ekikaleka embanulho iyabya kihembo ky’omubongo okw’ithwe.

4. Engebe eyihikene yamanyisaya ki oku Adamu?

⁴ Omughulhu Yehova ahangika Adamu, mwamuha ekindu ky’obughuli​—engebe eyihikene. Thalengekania ekyo nga kyamanyisaya ki oku Adamu. Mwahangikwa inyahikene omwa mubiri n’ebirengekanio, syanga lhwere, erikekelhuha, kutse eriholha. Ng’omundu oyuhikene, abya awithe enkolangana na Yehova ey’embaghane. E Biblia yikabugha yithi Adamu abya ‘mughalha wa Nyamuhanga.’ (Luka 3:38) Busana n’ekyo, Adamu abya n’enkolangana eya hakuhi na Nyamuhanga Yehova, ng’ey’omwana awithe na thatha w’olhwanzo. Yehova inyaka kaniranaya na mughalha wiwe w’okwa kihugho, eriha Adamu y’omubiiri owakatsemesaya n’erimubwira ebika muyithaghisibawako.​—Enzuko 1:28-30; 2:16, 17.

5. E Biblia yikamanyisayaki omughulhu yikabugha yithi Adamu mwakolhwa ‘omwa kisosekanio kya Nyamuhanga’?

⁵ Adamu mwakolhwa ‘omwa kisosekanio kya Nyamuhanga.’ (Enzuko 1:27) Ekyo mwakitha manyisya kithi Adamu abya asosire Nyamuhanga y’okwa mubiri. Ngokwa thw’igha omwa Sura 1 ey’ekitabu kino, Yehova ni mulimu owathelhangirawa. (Yoane 4:24) Busana n’ekyo, Yehova syawithe omubiri w’omunyoku n’omusasi. Erikolhwa omwa kisosekanio kya Nyamuhanga kya manyisaya kithi Adamu mwa hangikwa n’emibere eyisosire ng’eya Nyamuhanga, mwamuli olhwanzo, amenge, obulingirirania, n’obuthoki. Adamu abya nga Thatha wiwe omwa yindi nzira y’omubongo kundi abya awithe obughabe bw’eriyithwiramu. Busana n’ekyo, Adamu  syabya ng’ekyuma ekyangakolha ekya babiri kitheghekera erikolha. Aliriryo, inyaka yithwiramu ahabwiwe, erisombolha ahakathi-kathi k’ekibuya n’ekibi. Kwa sombolha eriowa Nyamuhanga, angabereho kera na kera okwa kihugho Paradiso.

6. Omughulhu Adamu aghana eriowa Nyamuhanga, mwaherya ki, n’olhubuthu lhwiwe mulhwa hambwaku lhuthi?

⁶ Neryo kwesi, omughulhu Adamu aghana eriowa Nyamuhanga n’eritswerwa olhubanza olhw’erikwa, mwaliha omuhendo munene kutsibu. Ekibi kiwe mukyaleka inyaherya engebe eyihikene n’emighisa yayo yosi. (Enzuko 3:17-19) Eky’obulighe, Adamu mwaherya engebe y’obughuli eno butsira eyiwe nyisa aliriryo n’ey’abaana biwe abanga buthwire. Ekinywe kya Nyamuhanga kikabugha kithi: ‘Ebibi mubyahika muna-kihugho busana n’omundu mughuma, n’olhuholho mulhwingira busana n’ekibi kiwe; neryo lithya olhuholho mulhwahika okw’abandu abosi, kusangwa abosi mubakolha ebibi.’ (Abanya Roma 5:12) Kwenene, ithwe abosi thwabirisighalya ekibi erilhua oku Adamu. Busana n’ekyo, e Biblia yikabugha yithi mwa ‘yighulya’ haghuma n’olhubuthu lhwiwe omwa bukobe bw’ekibi n’olhuholho. (Abanya Roma 7:14) Adamu na Eva babya isibakiwithe maha kusangwa mubakighenderera erithendiowa Nyamuhanga. Kandi ibbwa olhubuthu lhwabu, n’ethu imwa thune?

7, 8. Ni bindu ki bibiri ebye embanulho yikamanyisaya?

⁷ Yehova mwalhamya abandu erilhabira omwa mbanulho. Embanulho niki? Omwatsi w’embanulho kutsibu-tsibu akamanyisaya bindu bibiri. Eky’erimbere, embanulho y’endihi eyikathuhawa eriboholha kutse erighulha ekindu kyanga kusubulira. Yangana sosekanibwa n’endihi eyikathuhawa busana n’eriboholha omunya ngomo oyukahambirawa omwa lhuhi. Ekyakabiri, embanulho w’omuhendo owakahirawaho erithuha ekindu. Yisosene n’omuhendo owakathuhawa eriliha omundu kutse ekindu ekiryatsandibawa. Ng’eky’erireberyako, omundu amaleka hakabya obutandwa, inyakendi thuha omuhendo ow’ingene-ngene ndeke n’ekindu ekiryatsandibawa.

⁸ Kyanga thokekene kithi erithuha eriherya lingi erya Adamu ahira okw’ithwe abosi n’erithuboholha erilhua omwa  bukobe bw’ekibi n’olhuholho? Leka thulebaye embanulho eya Yehova athegheka n’ekya yanga manyisya okw’iwe.

9. Ni mbanulho mulingo ki eya yithaghisibawa?

⁹ Kusangwa engebe eyihikene ey’omundu muya heribwa, si hangabere engebe y’omundu oyuthahikene eyanga ghulireyo. (Esyonyimbo 49:7, 8) Ekya yithaghisibawa yabya iy’embanulho ey’ingene-ngene n’omuhendo owa thalha. Kino kikahambangana n’omusingi ow’obulingirirania obuhikene owali omwa Kinywe kya Nyamuhanga, owakabugha athi: “Engebe busana n’engebe.” (Eryibuka Ebihano 19:21) Neryo, ekyanga thuhire omuhendo w’engebe y’omundu eyihikene, eya Adamu aheraya niki? Eyindi ngebe y’omundu eyihikene ya yangabere mbanulho ey’ingene-ngene n’eya yithaghisibawa.​—1 Timoteo 2:6.

10. Yehova mw’athegheka athi embanulho?

¹⁰ Yehova mwathegheka embanulho y’athi? Mwathuma okwa kihugho kw’omughuma w’okw’abaghalha biwe ab’ekirimu abahikene. Aliriryo Yehova mwatha kwama kyathuma ekihangikwa kyosi-kyosi eky’ekirimu. Mwathuma ow’obughuli bunene eyali, Mughalha wiwe ekyusa. (1 Yoane 4:9, 10) Omughalha ono mwa sigha obwikalho bwiwe obw’elhubulha ahathe erikakwa. (Abanya Filipi 2:7) Ngokwa thw’igha omwa sura eyihwere ey’ekitabu kino, Yehova mwakolha ekithiko-thiko omughulhu ahumaya engebe ya Mughalha ono erihirayo omw’ibunda lya Maria. Erilhabira omwa mulimu abuyirire wa Nyamuhanga, Yesu mwabuthwa ng’omundu oyuhikene kandi syabya kwa lhubanza lhw’ekibi.​—Luka 1:35.

11. Omundu mughuma angabere athi mbanulho busana n’obukekulhu bw’abandu?

¹¹ Omundu mughuma angabere athi mbanulho busana n’obukekulhu bw’abandu? Erimbere, abandu bangi aba abahikire omwa bukekulhu mubabya bathi bakolha-nabi? Wibuke wuthi busana n’erikolha ekibi, Adamu mwaherya obughuda obw’obughuli bunene obw’engebe eyihikene. Busana n’ekyo, syanga lhabirye engebe eyihikene okwa lhubutho  lhwiwe. Aliriryo, anga basighalirye ekibi n’olhuholho. Yesu, oyo e Biblia yikahulha mwa “Adamu w’enyuma,” aby’awithe engebe eyihikene, kandi mwathahalya. (1 Abanya Korinto 15:45) Ni bugha ambu, Yesu mwasuba omwa mwanya wa Adamu nuku athulhamaye. Yesu erihonga, kutse erihayo engebe yiwe eyihikene n’erisighalha mwowa oyuhikene oku Nyamuhanga, mwaliha endihi ey’ekibi kya Adamu. Omwa nzira eyi, Yesu mwalethera olhubuthu lhwa Adamu lhw’amaha.​—Abanya Roma 5:19; 1 Abanya Korinto 15:21, 22.

12. Eriaghalhwa lya Yesu mulya kangania ki?

¹² E Biblia yikasoborera buuli eriaghalhwa erya Yesu ayiyinaya athali aholha. Mwa swiribwa kutsibu, ahanikwa, n’eriholha olhuholho olhukaghalhaya okwa muthi w’amalighe. (Yoane 19:1, 16-18, 30; “Enyongezyo, Ekikaleka Abakrisitayo ab’Ekwenene Ibathakolesya Omusalaba omw’Iramya”) Busana naki kya yithaghisibawa Yesu eriaghalhwa kutsibu? Enguma okwa syasura esikayasa embere omwa kitabu kino, thukendi igha ngoku Sitani abirithika-thikira Yehova ng’anawithe mundu wosi-wosi oyuwanga sighalha muthaleghulha amalengwako. Omw’iyiyinia buthaleghulha n’omwa hanabya eriaghalhwa lingi, Yesu mwasubirya ndeke-ndeke erihakanisya lya Sitani. Yesu mwakangania ngokwa omundu oyuhikene oyuwithe obughabe bw’eriyithwiramu angana sighere muthaleghulha oku Nyamuhanga n’omwakine indi hane ebya Diabolo aby’akolire. Yehova angabya imwatsema kutsibu busana n’obuthaleghulha bwa Mughalha wiwe omwanze!​—Emisyo 27:11.

13. Embanulho muyathuhwa yithi?

¹³ Embanulho muyathuhwa yithi? Okwa kiro kye 14 eky’omukera w’Abayuda owe Nisani omwa 33 C.E., Nyamuhanga mwalighira Mughalha wiwe oyuhikene n’oyuthawithe kibi erithibwa. Neryo Yesu mwahonga engebe yiwe ey’omubiri eyihikene “ngendo nguma busana na kera na kera.” (Abaebrania 10:10) Okwa kiro kya kasathu enyuma w’eriholha lya Yesu, Yehova mwa mulhubukirya okwa ngebe y’ekirimu. Elhubulha, Yesu mwaha Nyamuhanga y’omuhendo w’erihayo engebe ey’omubiri wiwe ng’embanulho busana n’erighulha olhubutho lhwa Adamu. (Abaebrania 9:24) Yehova  mwaligha omuhendo w’ekihongo kya Yesu ng’embanulho eya yithaghisibawa erisabulha abandu erilhua omwa bukobe bw’ekibi n’olhuholho.​—Abanya Roma 3:23, 24.

14, 15. Eribana ‘eribuyirwa ly’ebibi byethu,’ thutholere ithwa kolha ki?

¹⁴ N’omwa thune omwa mibere y’ekibi, thwangana bana emighisa ey’obughuli bunene busana n’embanulho. Thutha lebya ebighuma okwa mighisa eya thukabana munabwire n’ey’omughulhu owakayasa eyikalhua omwa kihembo kikulhu kino ekyalhua ewa Nyamuhanga.

¹⁵ Erighanyirwa ly’ebibi. Busana n’erisighalya erithendi hikana, thutholere eriyikasa kutsibu erikolha ekihikire. Ithwe abosi thukasobaya omwa ebya thukabugha kutse n’omwa ebya thukakolha. Aliriryo erilhabira omwa mbanulho y’ekihongo kya Yesu, thwanganabana ‘eribuyirwa ly’ebibi byethu.’ (Abanya Kolosai 1:13, 14) Nomwakine, eribana erighanyirwa eryo, thutholere ithwa yisubamu kwenene. Kandi thutholere ithwa yisengerezya Nyamuhanga omwi yibombeka, n’erimusaba ekighanyiro ekiseghemere okw’ikirirya lyethu omwa kihongo ky’embanulho ya Mughalha wiwe.​—1 Yoane 1:8, 9.

16. Ekikathuthokesaya eriramya Nyamuhanga n’obunya muthima-thima obuhenirye niki, kandi omubongo ow’obunya muthima-thima ng’obu niki?

¹⁶ Obunya muthima-thima obuhenirye embere sya Nyamuhanga. Obunya muthima-thima obutsandire bwangana thukolya okwi thendibya n’amaha n’erileka ithwayowa nga si thuwithe mubongo. Nomwakine, erilhabira omwi ghanyirwa erya thwabiribana busana n’embanulho, Yehova akathuthokesaya erimuramya n’obunya muthima-thima obuhenirye n’omwa thutha hikene. (Abaebrania 9:13, 14) Kino kikaleka ithwa thoka erikania na Yehova buthubaha. Busana n’ekyo, thuwithe obwiranda obw’erimusaba. (Abaebrania 4:14-16) Eritheya obunya muthima-thima obuhenirye kikathuha ebirengekanio ebihumulikene, kikakulha-kulhanaya eriyisikya, kandi kikaletha n’etseme.

17. Ni mighisa ki eyikathokekana busana na Yesu erithuholera?

 ¹⁷ Amaha w’engebe y’erikotha okwa kihugho paradiso. ­Abanya Roma 6:23 hakabugha hathi: ‘Obuhingi bw’erikolha ebibi ni lhuholho.’ Omulhondo mughumerera akongerako athi: ‘Nikwa olhusunzo olhukalhua oku Nyamuhanga ni ngebe y’erikotha busana n’erimathikana na Kristo Yesu, Omukama wethu.’ Omwa Sura 3 ey’ekitabu kino, muthwa kanirye okwa mighisa y’ekihugho Paradiso ekikasa. (Eribisulirwa 21:3, 4) Emighisa eyosi eyo eyiri embere, imwamuli engebe y’erikotha omwa buyingo obuhikene, bikathokekana kusangwa Yesu mwathuholera. Eribana emighisa eyo, thutholere ithwakangania thuthi thukasima ekihembo ky’embanulho.

18. Busana naki thutholere ithwa sima Yehova busana n’ekihembo ky’embanulho?

¹⁸ Busana naki thutholere ithwa sima Yehova ya kutsibu busana n’embanulho? Ekihembo, kwilhabirirya kikabya ky’obughuli oyukakiha amabya imw’akakolesaya endambi, akaghalha, kutse esyombulho akathuhererya kyo. Thuka hambawako kutsibu omughulhu thukalhangira thuthi oyulyathuha ekihembo, alyathukanganaya olhwanzo olhw’ekwenene. Embanulho kye ekihembo ky’obughuli bunene okwa bihembo byosi, kusangwa Nyamuhanga mwa yihayo kutsibu akathuha yo. Yoane 3:16 akabugha athi: ‘Nyamuhanga  mwanza ekihugho ky’athya, kyaleka inyaha Mughalha wiwe, ekyusa kiwe.’ Embanulho ni bwema bw’endatha kutsibu obukakanganaya olhwanzo lhwa Yehova busana n’ethu. Kandi yikakanganaya olhwanzo lhwa Yesu, kusangwa mwayihayo eriha engebe yiwe busana n’ethu. (Yoane 15:13) Neryo kwesi, ekihembo ky’embanulho kitholere ikya thukangania ngoku Yehova na Mughalha wiwe banzire buli mundu.​—Abanya Galatia 2:20.

19, 20. Ni nzira syahi esya wanga kanganiryamu ngoku wukasima ekihembo kya Nyamuhanga eky’embanulho?

¹⁹ Ibbwa, kwesi, wanga kangania wuthi ngokwa wukasima ekihembo kya Nyamuhanga eky’embanulho? Eky’erimbere okwa byosi, yikase eriminya bingi ebihambire okwa Muhithya Mukulhu, Yehova. (Yoane 17:3) Erigha e Biblia erilhabira mwa kitabu kino, likendi kuwathikya erikolha ekyo. Wukendibya wuna mw’ongera eriminya Yehova, olhwanzo lhwawu busana nayu lhukendi ongera. Kandi olhwanzo olho, lhukendi leka iwanza erimutsemesya.​—1 Yoane 5:3.

²⁰ Kanganaya wuthi w’ikirirye omwa kihongo ky’embanulho ya Yesu. Yesu iyuwene-wene mwabugha athi: ‘Oyukikiriraya Omughalha awithe engebe y’erikotha.’ (Yoane 3:36) Thwanga kangania thuthi ngoku thw’ikirirye omu Yesu? Erikirirya ng’eryo siriri kanganibawa omwa binywe bisa. Yakobo 2:26 hakabugha hathi: “Erikirirya butsira mibi[i]ri liholire.” Inga, erikirirya ery’ekwenene likakanganibawa omwa “mibi[i]ri,” ni bugha ambu, omwa mikolere yethu. Enzira nguma ey’erikangania thuthi thw’ikirirye omu Yesu ly’eriyikasa kutsibu erimugherererya butsira omwa ebya thukabugha bisa aliriryo n’omwa ebya thukakolha.​—Yoane 13:15.

21, 22. (a) Busana naki thutholere ithwa hindana okwa mukonga w’Ekihulho ky’Omukama eky’Erigholho-Gholho? (b) Ekikendi syasoborerwa omwa Sura eyo 6 n’eyo 7 niki?

²¹ Hindana okwa mukonga ow’obuli mwaka ow’Ekihulho eky’Omukama eky’Erigholho-Gholho. Erigholho-gholho ly’ebiro 14 Nisani, 33 C.E., Yesu mwatsukisya omukonga w’embaghane owa e Biblia yikahulha mwa “ekihulho ky’Omukama eky’erigholho-gholho.” (1 Abanya Korinto 11:20, NW; Matayo 26:26-28) Omukonga ono kandi  ­akahulhawa mwa Eribuka olhuholho lhwa Kristo. Yesu mwatsukisya gho eriwathikya abakwenda biwe n’Abakristayo abosi ab’ekwenene abangasire enyuma syabu eriminya indi erilhabira omwa lhuholho lhwiwe ng’omundu oyuhikene, mw’aha engebe yiwe ng’embanulho. Erikwamana n’omukonga ono, Yesu mwalhaghira athi: “Mukole mut[h]ya erinyibuka.” (Luka 22:19) Eryibuka ekiro ky’Olhuholho lhwa Yesu kika thw’ibukaya olhwanzo lhunene kutsibu olhwa Yehova na Yesu bakanganaya erihambangana n’embanulho. Thwangana kangania erisima lyethu embanulho omw’ihindana okw’Ibuka ly’Olhuholho lhwa Yesu erya buli mwaka. *

²² Embanulho eya Yehova abirithuha, kwenene ni kihembo ky’obughuli bunene. (2 Abanya Korinto 9:14, 15) Ekihembo ky’obughuli bunene eki kyangana ghasira n’ababiriholha. Esura eyo 6 n’eyo 7 sikendi soborera nga yanga ghasa yithi.