1. Ekyangaletha etseme y’omwa eka niki?

NYAMUHANGA YEHOVA anzire eka yawu iya tsema. Ekinywe kiwe, e Biblia, kikaha buli mughuma w’omwa eka y’obusondoli, kikakangania ekya Nyamuhanga anzire buli mundu inyakolha. Abandu b’omwa eka bamaberererya olhukwamirwa lhwabu erikwamana n’ekihano kya Nyamuhanga, ebyanga lhwiririramu ibikendi tsemesya kutsibu. Yesu mwabugha athi: ‘Obutseme buli okw’abakowa ekinywe kya Nyamuhanga n’erikolha kyo.’​—Luka 11:28.

2. Etseme y’eka yikaseghemera okw’ithwe eriminya ki?

² Etseme y’eka kutsibu-tsibu yiseghemere okw’ithwe eriminya ngoku enzuko y’amaka ni Yehova, oyo Yesu ahulha athi, ‘Thatha Wethu.’ (Matayo 6:9) Obuli eka okwa kihugho yiriho busana na Thatha wethu ow’elhubulha​—kandi anasi ndeke-ndeke ebikatsemesaya amaka. (Abanya Efeso 3:14, 15) Ibbwa kwesi, e Biblia yikakangiriraya ki okwa lhukwamirwa olhwa buli mundu omwa eka?

3. E Biblia yikasoborera yithi enzuko y’amaka w’abandu, kandi thukaminya thuthi ngoku ebya yikabugha ni kwenene?

³ Yehova mwahangika abandu ab’erimbere, Adamu na Eva,  n’eribamathania haghuma ng’omulhume n’omukali. Mwabahira omwa eka eyuwene okwa kihugho paradiso​—eririma ly’Edeni​—n’eribabwira athi babuthe abaana. Yehova mwabugha athi, ‘Mubuthe mukanyirire musulhaye ekihugho.’ (Enzuko 1:26-28; 2:18, 21-24) Olhu si lhughano buyira kutse mukya, kundi Yesu mwakangania athi ebya Enzuka yikabugha ebihambire okw’itsuka ly’amaka ni kwenene. (Matayo 19:4, 5) Nomwakine indi thukabana ebitsibu bingi kandi nalino engebe siyiri ngoku Nyamuhanga athegheka yo eribya, thulebaye ekyangaleka ithwabugha thuthi etseme y’omwa eka yangana thokekana.

4. (a) Obuli mughuma w’omwa eka ang’ongera athi okwa tseme y’eka? (b) Busana naki erigha engebe ya Yesu ni ky’omubongo kutsibu omwa tseme y’eka?

⁴ Buli mundu omwa eka angana wathikya omwi tsemesya eka akagherererya Nyamuhanga omwi kangania olhwanzo. (Abanya Efeso 5:1, 2) Aliriryo, thwanga gherererya thuthi Nyamuhanga, oyuthuthe thwanga lhangira nibya? Thwangan’igha ngoku Yehova akakolha kusangwa mwathuma Mughalha wiwe akambere okwa kihugho. (Yoane 1:14, 18) Omughulhu abya okwa kihugho, Omughalha ono, Yesu Kristo, mwagherererya Thatha wiwe w’elhubulha ya ndeke indi erilhangira n’erihulikirira Yesu kyabya ng’eribya na Yehova iwuna mumwowa. (Yoane 14:9) Busana n’ekyo, erigha okwa lhwanzo olhwa Yesu akanganaya n’erikwama eky’erireberyako kiwe, buli mughuma okw’ithwe angana wathikya omwi tsemesya kutsibu eka.

5, 6. (a) Emibere eya Yesu akathwalira mw’ekithunga, kikahiraho kithi eky’erireberyako okw’abalhume? (b) Ekitholere erikolhwa niki erighanyirwa amalholho?

⁵ E Biblia yikabugha yithi abalhume batholere ibathwalha bakali babu nga Yesu kw’akathwalha abigha biwe. Thaghanirya okwa busondoli bwe Biblia buno: ‘Abiba, mwanze abakali benyu, ngoku Kristo mwanza ekanisa. Kusangwa Kristo mwayiha busana n’ekanisa. Lithya abiba kwa banze abakali babu bo bathya ngoku bakanza emibiri yabu. Oyukanza omukali wiwe akayanza. Kusangwa sihali mundu na kera oyukakwa omubiri  wiwe w’obusu, nikwa akaha gho akalyo n’erisugha gho, ngoku Kristo akakolha busana n’ekanisa.’​—Abanya Efeso 5:23, 25-29.

⁶ Olhwanzo lhwa Yesu busana n’ekithunga eky’abigha biwe kikahiraho eky’erireberyako ekihikire okw’abalhume. Yesu “mwanzabo erihika ok[wa] nduli,” erihayo engebe yiwe busana nabu, n’omwa banabya isibahikene. (Yoane 13:1; 15:13) Kuthya, abalhume bakabwirawa indi: “Mwanze abakali benyu, simukale kubo.” (Abanya Kolosai 3:19) Ekikendi wathikya omulhume erikolesya ekihano ng’ekyo niki, kwilhabirirya mukali wiwe amabya okwa bundi buthuku inyaka lemawa erikolha omwa nzira eyitholere? Atholere iny’ibuka nayu ngokwa akanasobaya n’eky’atholere inyakolha eribana erighanyirwa lya Nyamuhanga. Atholere inyakolha ki? Atholere inya ghanyira abakamusoberaya, mwamuli na mukali wiwe. Omukali nayu atholere inyakolha athya. (Matayo 6:12, 14, 15) Wanamalhangira enzumwa eyikaleka abandi iba bugha bathi obutheke bubuya bw’obughuma obw’abandu babiri abakaghanyirana?

7. Yesu mwatsomana ki, kandi kikahiraho eky’erireberyako ki okw’abalhume?

⁷ Kandi abalhume batholere ibaminya indi Yesu inyaka tsomana abigha biwe mughulhu wosi. Mwatsomana erilemererwa lyabu n’ebiyithawa byabu by’omubiri. Ng’eky’erireberyako, omughulhu babya balhuhire, mwabugha athi: “Mwase inyw[i]bene ahathe bandu, mul[h]uhuke hake.” (Mariko 6:30-32) Abakali nabu bakayithagha eritsomanwa kutsibu. E Biblia yikabakanayako ‘ng’abolho’ abo abalhume bakalhaghirawa ‘eribasikya.’ Busana naki? Kusangwa omulhume n’omukali abosi bawithe ‘olhusunzo lhwa Nyamuhanga olhw’engebe.’ (1 Petero 3:7) Abalhume batholere ib’ibuka indi ekikakolha omundu mwa w’obughuli eyiri Nyamuhanga bw’obuthaleghulha, butsira omundu eribya mulhume kutse mukali.​—Esyonyimbo 101:6.

8. (a) Busana naki kiri kithi omulhume “oyukanza mukali w[i]we akayanza”? (b) Eribya “mubiri mug[h]uma” kikamanyisaya ki okwa mulhume n’omukali wiwe?

⁸ E Biblia yikabugha yithi omulhume “oyukanza omukali w[i]we akayanza.” Ni busana omulhume n’omukali bakabya “sibakiri babiri, nikwa mubiri mug[h]uma,” ngoku Yesu akanganaya.  (Matayo 19:6) Neryo emyatsi y’engingo yitholere iyabya yabu basa. (Emisyo 5:15-21; Abaebrania 13:⁠4) Bangana berererya eki owundi amatsomana ebiyithawa eby’owundi. (1 Abanya Korinto 7:3-5) Eky’eryibuka kya kino: ‘Sihali mundu na kera oyukakwa omubiri wiwe w’obusu, nikwa akaha gho akalyo n’erisugha gho.’ Abalhume batholere ibanza abakali babu ngoku bayanzire, iban’ibukire indi bali b’erilhuthonda eyiri mukulhu wabu, Yesu Kristo.​—Abanya Efeso 5:29; 1 Abanya Korinto 11:3.

9. Yesu awithe mubere ki ow’akanibweko omwa Abanya Filipi 1:8, kandi busana naki abalhume batholere ibakangania omubere oyu eyiri bakali babu?

⁹ Omukwenda Paulo mwakania okwa ‘lhwanzo lhw’olhukeri olhwa Kristo Yesu awithe.’ (Abanya Filipi 1:8, NW) Olhukeri lhwa Yesu abya mubere ow’erihumulikania, owabya akatsemesya abakali ababya babere bigha biwe. (Yoane 20:1, 11-13, 16) Abakali bakayithagha olhukeri ng’olhu erilhua okw’abira babu.

10. Abakali abathahibwa, Yesu akabahiriraho athi eky’erireberyako?

¹⁰ Eka ni kithunga, n’erisondolhwa ndeke, kikayithagha omukulhu. Yesu nayu anawithe oyo akakenga nga Mukulhu wiwe. ‘Nyamuhanga ni mukulhu wa Kristo,’ ngokwa ‘omulhume ni mukulhu w’omukali wiwe.’ (1 Abanya Korinto 11:3) Yesu erikenga obukulhu bwa Nyamuhanga, ni ky’erireberyako kibuya, kundi ithwe abosi thuwithe omukulhu oyo thutholere erikenga.

11. Ni mibere ki eyo omukali atholere inyabya nayu embere sya mwira wiwe, kandi emighendere yiwe yanga yira mubongo ki?

¹¹ Abalhume abathahikene bakasobaya kandi mughulhu mungi bakalemawa eribya eky’erireberyako kibuya ng’abakulhu b’eka. Neryo, omukali atholere inyakolha ki? Syatholere akaghaya ebya mwira wiwe akakolha kutse erilengesya erimusaghulha obukulhu bwiwe. Omukali atholere iny’ibuka indi omw’ameso wa Nyamuhanga, ekirimu ekihehere n’eky’obukuthu ni ky’omubongo kutsibu. (1 Petero 3:4) Omwi kangania ekirimu ng’ekyo, ikikendi mw’olhobera erikangania erisikya ly’ekinyamuhanga, n’omughulhu hangabya erilengwako.  Eryongerako, e Biblia yikabugha yithi: ‘Omukali akenge iba wiwe.’ (Abanya Efeso 5:33) Aliriryo ibbwa, omulhume amathendi ikirirya Kristo nga Mukulhu wiwe? E Biblia yikahabulha abakali yithi: ‘Mwowe abiba benyu, neryo abathyowa ekinywe kya Nyamuhanga bathoke erisingwa n’erikirirya busana n’emighendere y’abakali babu, isibetha bwirwa ekinywe n’ekighuma. Kusangwa bakalebaya emighendere yenyu mibuya eyikakenga.’​—1 Petero 3:1, 2.

12. Busana naki sikibi omukali eriha ebirengekanio biwe omwisikya?

¹² Mbulha mwira wiwe ni mwikirirya mulikyabu kutse eyihi, sikiri manyisaya kithi omukali amakania omw’amenge ebya akalengekanaya ebihukene nebya mwira wiwe akabya isyawithe esyangeso. Ekirengekanio kiwe kyanganabya ikihikire, n’eka yosi yangana ghasirwa omulhume amamuhulikirira. Nomwakine indi Abrahamu mwatha lighirana na mukali wiwe, Sara mwahanulha ngoku ekitsibu kirebe kyangahwa omwa eka, Nyamuhanga mwabwira Abrahamu athi: ‘Hulikirira omulenge wiwe.’ (Enzuko 21:9-12) Kwenene, omughulhu omulhume akathwamu eky’erighunzerera okwa mwatsi mulebe owathe hakanisaya ekihano kya Nyamuhanga, mukali wiwe akakanganaya eryowa akasighika erithwamu eryo.​—Emibiri 5:29; Abanya Efeso 5:24.

13. (a) Tito 2:4, 5 akahabulha abakali bathahibwa erikolha ki? (b) E Biblia yikabugha yithiki okwi ghabulhana n’erikomolhana?

¹³ Omw’iberererya olhukwamirwa lhwiwe, omukali angana kolha bingi omwitheya eka. Ng’eky’erireberyako, e Biblia yikakanganaya yithi abakali abathahibwa batholere ‘erianza abiba babu, banze abaana babu, bayitheghaye, babye abakayihighulha okwa bibi. Babye abakakolha omubiiri w’eka, babye baghenge, bakenge abiba babu.’ (Tito 2:4, 5) Omukali nga mama w’abaana oyukakolha omwa nzira eyi inyakendi bana olhwanzo olhukakotha n’erisikibwa n’eka yiwe. (Emisyo 31:10, 28) Aliriryo, kundi obutheke ni mathana ly’abandu babiri abathahikene, emibere eyikalire yangana lhwiririra mw’erighabulhana kutse erikomolhana. E Biblia yikalighira erighabulhana omwa mibere mirebe. Aliriryo, erighabulhana ni mwatsi akalire, kundi e Biblia yikahabulha yithi: ‘Omukali syalhue okw’iba wiwe n’omulhume syahighe mukali wiwe.’ (1 Abanya Korinto 7:10, 11) Kandi  obusingiri busa okw’abathahenie bwa bukaha omusingi w’Amasako ow’erikomolhana.​—Matayo 19:9.

14. Yesu mwathwalha athi abaana, kandi abaana bakayithagha ki okw’ababuthi babu?

¹⁴ Yesu mwahiriraho ababuthi eky’erireberyako ekihikene omwa mibere ey’athwalira mw’abaana. Omughulhu abandi balengesaya erikakirya abaana balere eryasa eyiri Yesu, mwabugha athi: “Muleke aba[a]na balere base kw[’]ingye; simukakirayebo.” E Biblia yikabugha yithi ‘neryo mwahambabo omwa byalha biwe, mwahira kubo kw’ebyalha, mwatsumulhabo.’ (Mariko 10:13-16) Yesu amabya imwa ghunza endambi n’abaana balere, nenyu kwa mutha tholere erikolha muthya eyiri abaana benyu kwehi? Sibali yithagha kathambi kake buyira, aliriryo ndambi nene. Mutholere imwathwalha obuthuku muka bakangirirya, kundi ekyo kya Yehova akalhaghira ababuthi erikolha.​—Eryibuka Ebihano 6:4-9.

15. Ababuthi banga kolha ki eritheya abaana babu?

¹⁵ Ekihugho kino kina muyongera eribya kibi, abaana bakayithagha ababuthi abakendi batheya okw’abandu abakanza eribatsandya, ng’omwa myatsi y’obusingiri. Thalengekania Yesu ngoku atheghaya abigha biwe, omwa lhwanzo mwabahulha mwa “aba[a]na balere.” Omughulhu ahambawa  kandi inyakisiya iny’ithibwa, Yesu mwaronderya abigha biwe b’enzira ey’eritsweramu. (Yoane 13:33; 18:7-9) Ng’omubuthi, wutholere iwa yitheya okwi lengesya erya Diabolo akahiraho erianza erihuthalya abaana bawu. Wutholere iwasangwa wabakunga. * (1 Petero 5:8) Kinyamubiri, bunyakirimu, n’esyangeso syabu biri omwa kabi kutsibu kwilhaba kera.

16. Ababuthi bang’igha ki okwa mibere eya Yesu athwalira mw’ebisobyo ebya abighi biwe?

¹⁶ Omw’ithumbi Yesu athali aholha, abigha biwe muba kangalhukania okwa oyuwangabya mukulhu omwa kathi-kathi kabu. Omwa mwanya w’eribahithanako, Yesu mwalholha  embere eribahanulira omwa lhwanzo n’eribakangania eky’erireberyako. (Luka 22:24-27; Yoane 13:3-8) Wamabya iwuli mubuthi, wanamalhangira ngoku wanga kwama eky’erireberyako kya Yesu omwa mibere wukahabulira mw’abaana bawu? Kwenene, bakayithagha erihabulhwa, aliriryo litholere iryahebwa okwa “lhulengo olhutholere” butsira omw’ihithana. Si wutholere wukakania butha lengekania “ng’eritsimit[h]a ly’omuyali.” (Yeremia 30:11, NW; Emisyo 12:18) Erihabulhwa litholere iryahebwa omwa nzira eyikendi leka omwana inyalhangira ngokwa lilhwe litholere.​—Abanya Efeso 6:4; Abaebrania 12:9-11.

17. Yesu mwahiriraho abaana eky’erireberyako ekihikene omu mibere ki?

¹⁷ Abaana bangan’ighira oku Yesu? Ee, bangana mw’ighirako! Omwa ky’erireberyako kiwe, Yesu mwakangania ngokw’abaana batholere erisikya ababuthi babu. Mwabugha athi, ‘Ngabugha emyatsi eyi ngoku Thatha anyikangiriraya.’ Mwongera athi: “Ngakol[h]a ebiro byosi emyatsi eyikamutsemesaya.” (Yoane 8:28, 29) Yesu abya mwowa eyiri Thatha wiwe ow’elhubulha, ne Biblia yikabwira abaana eriowa ababuthi babu. (Abanya Efeso 6:1-3) Nomwakine indi Yesu abya mwana oyuhikene, mwowa ababuthi biwe ab’omubiri, Yozefu na Maria, ababya isibahikene. Ahathe erithika-thika ekyo mukyalethera buli mughuma w’omwa eka yabu Yesu y’etseme!​—Luka 2:4, 5, 51, 52.

18. Busana naki Yesu inyakowa Thatha wiwe w’elhubulha mughulhu wosi, kandi abakatsema ni bahi omughulhu abaana bakowa ababuthi babu munabwire?

¹⁸ Abaana bangana lhangira esyonzira esyanga bawathikya eribya nga Yesu n’eritsemesya ababuthi babu? Kwenene, okwa bundi buthuku abaana bangana lhangira nga kikalire eriowa ababuthi babu, aliriryo Nyamuhanga akayithagha abaana eriowa ababuthi babu. (Emisyo 1:8; 6:20) Mughulhu wosi Yesu inyakowa Thatha wiwe ow’elhubulha, n’omughulhu ali omwa bitsibu ebikalire nibya. Kiro kighuma, omughulhu lyabya isonda lya Nyamuhanga indi Yesu akole ekindu ekikalire, Yesu mwabugha athi: ‘Nyilhusaye kw’olhuthehi olhu.’  ­N’omwa bine, Yesu mwakolha ekya Nyamuhanga amusaba, kusangwa mwaminya athi Thatha yuwabya asi ekyangabya kibuya. (Luka 22:42) Omw’igha eribya abowa, abaana ibakendi tsemesya kutsibu ababuthi babu na Thatha wabu ow’elhubulha. *​—Emisyo 23:22-25.

19. (a) Sitani akalenga athi okw’abaana? (b) Esyongeso mbi esy’abaana syanga hamba sithi okw’ababuthi?

¹⁹ Diabolo mwalenga oku Yesu, nethu thutholere ithwa kiminya thuthi akendi lenga n’okw’abalere erikolha ekibi. (Matayo 4:1-10) Sitani Diabolo akakolesaya ebyuka by’abandu abali omwa lhulengo lhwawu, ebyuka ebyanga kalha eriyikakirayako. Ka ni ky’omubongo kwesi abaana erithendi kolangana n’abakolha nabi! (1 Abanya Korinto 15:33) Mwali wa Yakobo ya Dina inyakasiba n’ababya isibali ramaya Yehova, n’eki mukyaletha ebitsibu bingi. (Enzuko 34:1, 2) Thalengekania eka nga banga yowa bathi omughuma w’okw’ibo alya yingiraya omwa myatsi y’obusingiri!​—Emisyo 17:21, 25.

20. Eribya n’eka eyitsemire, obuli mundu omwa eka atholere inyakolha ki?

²⁰ Kikolhoba erighumira ebitsibu by’eka, ebihano bye Biblia  byamakolesibwa. Erithwalira haghuma, erikolesya ebihano ng’ebyo kya kikaletha etseme y’omwa eka. Neryo abalhume, mwanze bakali benyu, kandi mubathwale ngoku Yesu akathwalha ekithunga kiwe. Abakali, mukenge obukulhu bw’abira benyu, kandi mukwame eky’erireberyako eky’omukali omughenge oyukakanibawako omwa Emisyo 31:10-31. Ababuthi, mukangiriraye abaana benyu. (Emisyo 22:6) Abathatha, ‘theghaya ndeke ab’omwawu.’ (1 Timoteo 3:4, 5; 5:8) N’abaana, mukenge ababuthi benyu. (Abanya Kolosai 3:20) Sihali n’omughuma omwa eka oyuhikene, abosi bakasobaya. Busana n’ekyo, muyikehaye, mukasabangana ekighanyiro.

21. Ni bindu byahi bibuyanga ebya thulindirire embere eyi, kandi thwangabya thuthi n’eka eyiri mw’etseme munabwire?

²¹ Kwenene, e Biblia yiri mw’ebihano n’obusondoli bungi obw’omubongo obukakanaya okwa mibere y’eka. Eryongerako, yikakangiriraya okwa kihugho kya Nyamuhanga ekihya-kihya ekindi syabya paradiso eyoswire mw’abandu abatsemire abakaramaya Yehova. (Eribisulirwa 21:3, 4) Ka ni bindu bibuyanga ebya thulindirire embere eyi! Nalino, ­thwanganabya n’eka eyiri mw’etseme omw’ikolesya obusondoli bwa Nyamuhanga obukabanika omwa Kinywe kiwe, e Biblia.